PSG chakna Mbappe-a hattrick

Kylian Mbappe tel loa khelh zir chu Paris Saint Germain tan a harsa a, an theih chhung chu ṭangkai taka hman mai a fin thlakin a rinawm - Mbappe goal thum hmangin Montpellier chu 6-2 in an hneh.

Pathianni zan Ligue 1 inkhelah France captain Mbappe bakah hian Vitinha, Lee Kang-in leh Nuno Memdes ten goal khat ṭheuh an khung bawk a, nuamsa takin khualmual aṭangin point thum an hlawh chhuak.

Kum 25 mi Mbappe hian tun season tawp ruala a contract zo tur pawhsei a tum tawh lo a, club dang a zawm dawn. PSG coach Luis Enrique chuan an player ṭha tel loa khelh an zir a ngaih thu a sawi ṭhin a ni.

Enrique-a'n an league match hnuhnung pathumah Mbappe hi bench lamah a dah a, mamawh hunah chhawr ni tho mah se hun a hmang tam tawk ṭhin lo, tun ṭumah chuan a bul aṭanga khelin hun pawh a ngah, goal pawh a khung hnem leh ta.

PSG manager Enrique chuan, "A bul kan ṭan ṭhain goal pawh kan nei hma, tihsual leh siamṭhat ngai lai chu la awm zeuh zeuh mah se kan khel ṭha takzet a ni," a ti. Ligue 1 bakah Champions League nomawi an la beisei mek bawk.