Barcelona hmaah Atletico an thamral

Xavi-a season tawp ber turah Barcelona-in champion nomawi chawi ngei an duh a, La Liga-ah Real Madrid an la um ve zel - Pathianni zan khan Atletico Madrid chu 3-0 in an sawp a, table-ah pahnihnaah an invawrh chho.

Atletico Madrid aṭanga loan-a Barcelona pantu Joao Felix chuan a club dik tak zawk lakah goal a khung a, Portuguese forward bakah hian Robert Lewandowski leh Fermin Lopez ten goal khat ve ve an khung bawk.

Barcelona hian match 29 khelh aṭangin point 64 an nei ta a, hmahruaitu Real Madrid chu point riatin an la phak lo mek - Real leh Barcelona hi vawi khat an la intawng leh dawn a, Catalan club-in beiseina an la nei ve reng.

Atletico erawh an tlawm avangin table-ah pangana an ni zui a, champion chu sawi loh, season thara Champions League khel phak tur pawhin insiamṭhat fe an mamawh - palina Athletic Bilbao chu point khatin an phak lo mek.

Di hlui

July 2019 khan Felix-a'n Benfica aṭangin pound maktaduai 113 zetin Atletico Madrid a zawm a, a chungah beiseina a sang hle. Portuguese forward hian khel chhe hran lo mah se, a man a san em avangin an duhkhawp lo.

Season hmasa chawhnu lam kha chu Chelsea-ah loan-in kaltir a ni a, mahse, coach thar Mauricio Pochettino-a player duh zawng a nih loh avangin Atletico-ah a kir. Madrid khaw club thuneitute nen an inhmu thiam lo a, Fabrizio Romano nena an inkawmnaah Barca a zawm châk thu a sawi zui.

Felix hian, "Barca tana ka khel a nih chuan duhthusam thleng dik a ni ang," a ti hial a, Atletico fan-ten heti taka an hmelma club tana khelh a lo châk hi an hrethiam lo a, chhuak turin an duh a, an haw takzet.

Barca-ah loan-in a kal ta ngei a, a club hlui khelmualah lenglutin goal a khung! Felix hian minute 38-naah Lewy siamsak chu goal-ah a chantir a, amah duh lotu club laka a goal khung erawh a lawm duh lo.

Tha a zuai

Nilaini zanah Atletico-in Champions League round of 16 second leg game hautak zet an khel a, minute 120 chhung Inter Milan nen an inhnehtawk avangin, penalty-ah 3-2 in an chak hram - Pathianni zanah match hautak an nei zui.

Hei vang hian Atletico player-te an zuai a, an tha a tho lo! Pathianni zan inkhelah pawh, second half-ah chuan an nguai viau tawh a, hei hi Barca-in remchangah an la - second half ṭan aṭanga minute hnihna lekah Lewy chuan a belhchhah ve leh.

Barca hian an la duhtawk mai lo. Minute 65-naah Lopez a inlar ve leh a, an goal thumna leh chak nemnghehna goal a khung - Barca-in 3-0 in hnehna an chang a, 4-0 a chak thei an ni hial. Mahse, forward Vitor Roque chu fal taka a tlan hnuah Atletico defender Nahuel Molina chuan a titlu a, Molina hi hnawhchhuah a ni.

Catalan club goal thum khungah Lewy a inrawlh vek. Kum 35 mi forward hian chuai lam a pan ve tawh anga sawi ni mah se, a thiam a la theihnghilh lo. Tun season inelna hrang hrangah match 39 khela goal 20 khung tawhin, assist vawi kua a nei bawk.