Kan tan zirlai a ni - Inzaghi

Inter Milan khel ṭha tluang lai tak chu tun hnaiah a bahlah. Atletico Madrid hneh loin Champions League aṭangin an tla, a hnu an match khelh leh hmasak berah Napoli nen 1-1 in an inhnehtawk leh ta.

Serie A hmahruaitu erawh fal takin an la ni tho a, mahse tun hnaia an chet fuh tawk lohna chu Simone Inzaghi-a'n an tan zirlai ṭha tak a nih thu a sawi a, insiamṭhat theih ngei a beisei.

San Siro-a inkhelah Inter hian defender Matteo Darmian hmangin goal nei hmasa mah se, hun tawp dawnah Naples club lamin defender Jesus hmangin an sut a, goal dang lut zui loin point an insem.

Inter coach Inzaghi chuan, "Lawm lohna tur kan nei nual, kan khel a nghet tawk lo hle. Mahse, kan chhe tak vek tihna erawh a ni bik lo a, tho chhuak leh turin theihna kan nei. Tun hnai kan match hnuhnung pahnih aṭang hian kan ṭhat tawk lohna lai a lang.

"Match 10 chhung kan chak zawn hnuah hetiang hi kan tawng a ni a, chuvangin engkim mai hi a la danglam thei. Season a tawp hma chuan fimkhur taka kan chet a ngai," tiin a sawi.

Inter Milan hian Serie A match 29 aṭangin point 76 an hmu a, anmahni hnaih bertu AC Milan aiin point 14 zetin hma an la hruai fal tho a ni.