Mizoram hmaah Jharkhand

India ram pum huap inelna - 14th Hockey India Senior Women National Championship hmawr bawk a hnai a, zanin dar 6:00 hian Mizoram chuan quarterfinal-ah Jharkhand an hmachhawn dawn.

Mizoram hian pool match an khelh zawh takah Himachal Pradesh, Rajasthan leh Punjab te an hneh vek. An khingpui tur Jharkhand hian international player pali an nei a, pool C hmahruaitu an ni ve thung.

Quarterfinal thlirlawkin Lalremsiami Hmar chuan, "Jharkhand hi team ṭha tak an ni a, hmachhawn pawh an awlsam dawn lo. Chutihrualin keini lam pawh kan ṭha ve tho a, kan tum anga kan khel chhuak thei a nih chuan kan hneh thei ang," tiin Vanglaini a hrilh.

Inelna hi Major Dhyanchand Hockey Stadium Pimpri, Pune-ah khelh a ni. Pune Mizo Welfare ten a hmunah an ṭawiawm ṭha thei hle. Remsiami hian Mizo mipuite thlawpna leh ṭawngṭai puina a dil bawk a ni.

Mizoram hian India ram hmun hrang hranga inkhel thiamte an ko khawm a, hun a tepter bakah kal khawm a harsa. Mahse, tunah chuan quarterfinal an thlen tak avangin ram pum huap inelna lian National Games khel turin an ting fel tawh.

Remsiami chuan, "Inbuatsaihna hun kan nei miah lo ang a ni a, chuti chung chuan kan inman hlawm viau. Player naupang zawkte pawhin theihtawp an chhuah a, inkhelhpui an nuamin khelmual chhung leh pawnah kan boruak a ṭha.

"Hockey ground chhungah Mizo ṭawng ngeiin kan inbe thei a, inkhelh ho a nuamin a boruak pawh a danglam hle. Kei ngei pawh hi vannei ka in ti hle a ni," tiin Vanglaini a hrilh - Remsiami hian match thum an khelh aṭangin goal sarih a khung tawh.

Mizoram player zawng zawng bakah an coach Lalroṭhuami (Bte-i) leh assistant coach Rosalind Lalchhanhimi Ralte te hi, Thenzawl SAI Hockey Training Center aṭanga inzir chhuak vek an ni a, tualchhung aṭanga zir chhuak an nihna hi a hlu hle.

Quarterfinal dangah Manipur leh Maharashtra; Madhya Pradesh leh Bengal; Haryana leh Odisha te an intum dawn bawk.