Goal kua luhnaah Aizawl FC an vanduai

Aizawl FC-in kuminah chak hmel an la hmu lo a, March 18, Thawhṭanni zan khan Inter Kashi chu 5-4 in an hneh lo. Mizo club hian minute 83-naah 4-3 in hma hruai mah se minute li chhung leka goal hnih an chuah avangin 5-4 in an vanduai.

I League-ah Mohammedan SC-in point 47 hmu tawhin pakhatnaah an awm a, Kolkata club hian anmahni hnaih bertu Sreenidi Deccan aiin point riatin an hmu tam zawk. Inter Kashi hian point 36 an hmu a, Aizawl FC erawh kumina an chet ṭha loh avangin point 21 hmuin 10-naah an tla thla tawh.

Mizo tlangval Edmund

Kalyani Stadium, West Bengal-ah Inter Kashi-in duhthusama ṭhain bul an ṭan a, Mizo club lakah Lunglei tlangval Edmund Lalrindika'n minute thumna lekah a thiam thil a lantir. Edmund hian Jordan Lamela hnen aṭanga a ball hmuh chu Aizawl FC defender bum nan hmangin goal ṭha a khung nghal.

Inter Kashi-in inkhel an thunun a, Gyamar Nikum-a'n minute 14-naah a khung belh. Aizawl FC insiamrem hretin Sumeet Passi-a'n an lama a tihluh zarah goal khat chhanglet mah se Inter Kashi-in Jordan Garrido hmangin minute 33-naah an khung belh.

Goal khung thiam Rinzuala

Aizawl FC tlarhnung a phui lo a, tlarhma lam erawhin goal khung an thiam. Serchhip tlangval Lalrinzuala'n freekick aṭanga ball per let chu minute 44-naah a pet goal.

First half-ah 3-2 in Aizawl FC an hnufual a, second half-ah Mizo club an chungnung ta zawk. Mizo club-in na takin an nawr a, Inter Kashi an talbuai. Mualneitu defender tihsual chu Rinzuala'n a hmang ṭangkai a, minute 61-naah si phurh sutna goal a khung.

Mizo tlangval Rinzuala hian kumin I League-ah match 17 khel tawhin goal 13 a khung a, assist vawi hnih a nei bawk. Tun season I League-ah Indian zinga top scorer a ni mek a, I League awm tawha Indian zinga goal khung tam ber record siam thei dinhmunah a ding.

Mohammed Rafi (2009–10) leh Sunil Chhetri (2013–14) te khan season khatah goal 14 an khung a, match 22 leh match 23 an mamawh. Rinzuala hian record siam turin goal hnih chiah khung a mamawh tawh a, goal 13 a khung chiah hian 2010-11 season-a Jeje Lalpekhlua'n Indian Arrows tana a khung zat record a nih rual.

Mizo club an vanduai

Aizawl FC an phur zel a, K. Lalrinfela'n (Mafela) goalkeeper chiah a hmachhawn hnuah a pet goal lo. Mahse, minute 83-naah Rinzuala ball pek chu Lalbiakdika'n la lutin Champhai Zotlang tlangval hian Mizo club tan hmahruaina goal a khung.

Hun a tam tawh loh avangin Aizawl FC chu kum 2024-ah a vawi khat nan an chak ve mai dawn niin a lang. Mahse, second half-a che ṭha Mizo club hi hun tawp lamah an talbuai. Aizawl FC-in Spanish forward Mario Barco an ngam lo a, kum 31 mi Mario hian minute 86-naah si phurh sutna goal a khung.

Minute thum hnuah Mario hian goal a khung lehnghal a, Mizo tlangval Edmund Lalrindika pass chu minute 89-naah goal-ah a chantir a, chakna goal a ni zui bawk. Aizawl FC-in tlarhnung an rem phui thei lo a, goal li ngawt an khung ṭumah goal nga an chhuah avangin point an hmu lo.