LPS CUP: BVT ngamtu Sihphir Venghlunin final an lut

Mahindra XUV3OO LPS Cup pawh a hmawr bawk a hnai ta a, Sihphir Venghlun chuan final lut turin Thawhṭanni zan khan Bethlehem Vengthlang an hneh nawn - ADFA hnuaia inter-village football-ah final an luh vawi khatna a ni.

RG Stadium, Mualpuia semifinal second leg-ah Siphir Venghlun hian 3-1 in Bethlehem Vengthlang an hneh a, first leg-ah 2-1 a an lo hneh tawh bawk avangin, inkhel pahnih belhkhawmah 5-2 in hnehna an chang.

BVT-in Amos Lalnienga hmangin goal hmahruai khung mah se, Sihphir tan player of the match atana thlan zui Joseph Lalṭhafela'n si phurh a sut a, Lalmuansanga'n goal hnih dang a khung bawk.

A tawpah khel ṭha zawk Sihphir Venghlunin LPS Cup-ah final an lut a, nizan khan semifinal second leg inkhel dangah Vaivakawn leh Kawnpui Jt. inkhelin, an result kan hre hman lo - Kawnpui hian first leg-ah 2-0 in hnehna an chang.

A thlawn mai maw

Football thiam veng tia hriat hlawh ṭhin BVT-in si phur sa chungin second leg an khel a, beiseina nei turin goal khung hma a ngai tih an hria - an beisei ang ngeiin goal pawh an khung hma a, minute thumna lekah Amos a inlar.

Sihphir Venghlun defender Lalruatsanga a chesual a, a ball petchhuah sual aṭanga ball kal zel chu Hmingthanmawia'n tlan luhpuiin ṭha zetin a cross a, BVT left back Amos hian an hmahruaina goal ni turin a khung.

Inkhel pahnih belhkhawmah 2-2 a ni chiah a, BVT-in beiseina an nei thar. Mahse, BVT hlim chhungte chu chhum rei lotê lang a, ral leh ang lek a ni - goal an khung aṭanga minute ruknaah Sihphir lam hian an chhanglet nghal!

Mual sir aṭangin Joseph Lalṭhafela'n freekick a pet a, BVT keeper Malsawmsanga tan man mai theih nia a lan laiin a man thei lo a, Neihbawih tlangval Joseph-a'n goal mawiah a chantir ta zawk - minute 10 pawh an khelh tlin hmain 1-1 a ni.

Kha aw Muansanga

BVT-in goal an chhuah aṭanga minute li hnu lawkah chance ṭha lutuk an nei. T. Vanlalruata ball vawrh luh ṭha zet chu Lalruatkima'n a um lut a, mahse, BVT tlangval hian hnai set sawt aṭangin goal-ah a chantir thei lo.

Inkhel pahnih belhkhawma dinhmun ṭha lo zawk BVT-in na takin an nawr chhunzawm a, mahse, goal chance mumal an insiam thei lo. Minute 17-naah Sihphirin an nawr let thut a, mahse, chance duhawm tak a neih chu Malsawmtluanga Pautuin a thlawh over!

BVT tan Vanlalruata'n corner aṭangin chance nei ve leh mah se, goal chung chiahah a tauh a, uiawm tak a ni. Sihphir tan Lalmuansanga'n a chance neih hmasak berah tauh goal lo mah se, minute 37-naah erawh a hlah nawn lo. BVT corner aṭanga ball kal zel hmangin Sihphirin an nawr let.

A tirah tifuh lo mah se, an insiamrem a, si phurh sutna goal khungtu Joseph-a ball pek ṭha lutuk chu Muansanga'n a tauh lut - RG Stadium-ah thawm a ring a, Sihphir mipui lawmin an zai a, 2-1 a ni.

Fan ngai loh ram

BVT-in si phur loa chawlhlawk hman duhin nawr zui mah se, chance an insiam hleithei lo a, counter-ah Sihphir an hlauhawm ve reng bawk - minute 63-naah Sihphir Venghlun tana Malsawmtluanga khung lohte chu uiawm tak a ni.

Mahse, Sihphir hian a hnu minute khatah goal dang an khung belh zui - mual ding lam sir aṭanga a ball hmuh chu Muansanga'n hnai set sawt aṭangin goal-ah a chantir a, 3-1 a ni a, BVT an zuai.

BVT tan Lalbiakmuana hmuhnawm viau mah se goal a keng tel lo a, Lungdai tlangval hi a vanneih zan a ni lo - Bethlehem Vengthlangin hun tawp thlengin, result thlak danglam tumin tha thawh mah se Sihphir Venghlun an ṭang ve tlat a, 3-1 in an chak.

Sihphir Venghlunin chenna ngai loh ram an fang a, March 22, Zirtawpni zana LPS Cup final khel turin an inpetkai - nizana Vaivakawn leh Kawnpui inkhela chak zawk nen final an khel dawn a, a vawi khat nan ADFA hnuaia Inter-Village football-ah champion an tum ang.