Lionel Messi inlan thei dawn lo

Lionel Messi chu Argentina tan a inlan thei dawn rih lo. Argentina Football Association (AFA) chuan an Captain hi a malpui a hliam tih an sawi a, hei vang hian El Salvador leh Costa Rica te nen friendly match an khelh hunah a tel thei dawn lo a ni.

Inter Miami leh Washington te an inkhelh ṭumin Messi hian a malpuiah hliam tenau a tuar. Miami coach Gerardo Martino chuan inkhelh banah Messi dinhmun chu ngaihchan a ngaih thu leh, an hma lawka CONCACAF Champions Cup quarterfinal an khelh tur a pawimawh thu a sawi bawk.

Kum 36 mi Messi hian Argentina tan match 180 aṭangin goal 106 a khung tawh a, a ṭhiante khung tur vawi 56 a siamsak tawh bawk - South America ram tan hian inlan tam, goal khung tam leh assiat tam lama record kawl khawm vektu a ni.

Copa America leh World Cup a chawi hnuah Messi hian hahdam leh nuamsa zawka football khelh a duh. Major League Soccer (MLS) a thlan chhan pawh football bakah a khawsak dan leh ram tana feh chhuah a hautak loh nan a ni ve bawk.

World champion Argentina hi June thlaa khelh tur Copa America atan an inbuatsaih chho mek an ni. Messi bakah hian AS Roma forward Paulo Dybala leh Bayer Leverkusen midfielder Exequiel Palacios te chu an inhnukdawk a, an hmun ruak luah tur hi nimin tlai thleng kha chuan koh an la ni lo.

Argentina hian March 23, Inrinni zing dar 5:30-ah El Salvador an tum dawn, chumi hnuah Costa Rica nen an la inkhel leh dawn bawk a ni.

Argentina Squad:

Goalkeepers: Emiliano Martínez (Aston Villa), Walter Benítez (PSV Eindhoven), Franco Armani (River Plate).

Defenders: Germán Pezzella (Betis), Nehuén Pérez (Udinese), Nicolás Otamendi (Benfica), Cristian Romero (Tottenham), Nicolás Tagliafico (Lyon), Marcos Senesi (Bournemouth), Valentín Barco (Brighton), Nahuel Molina (Atletico Madrid).

Midfielders: Exequiel Palacios (Bayer Leverkusen), Rodrigo De Paul (Atletico Madrid), Alexis Mac Allister (Liverpool), Leandro Paredes (Roma), Enzo Fernández (Chelsea), Giovani Lo Celso (Tottenham), Nico González (Fiorentina).

Forwards: Alejandro Garnacho (Manchester United), Facundo Buonanotte (Brighton), Valentín Carboni (Monza), Ángel Di Maria (Benfica), Lionel Messi (Inter Miami), Julian Alvarez (Manchester City), Lautaro Martínez (Inter Milan), Paulo Dybala (Roma).