Djokovic chawl lailawk dawn

Mipa tennis thuneitu sang - Association of Tennis Professionals (ATP) chuan ranking thar a ti chhuak a, a chung berah Novak Djokovic a la awm chhunzawm, a dawtah Carlos Alcaraz leh Jannik Sinner ten an zui a ni.

Indian Wells khelh zawh takah Djokovic hian beisei a phak lo, player langsar lo tak Luca Nardi lakah a tlawm a ni. United States lamah beisei a phak lohna hian a ranking-ah nghawng nei rih lo mah se, a inkhelh dan turah erawh nghawng a nei thung.

Vawiin aṭanga khelh ṭan tur Miami Open aṭangin Djokovic hi a inhnukdawk. Serbian star chuan, "Rokhawlhna eng emaw vangin kumin chu Miami Open ka khel lo ang, tun ang kum tawhah chuan tennis leh mimal thil ngaihtuah tel a ngai ve ta.

"Miami hi fans an awm ṭhatna hmun a ni a, khawvela tennis ngainatute awmkhawmna hmunpui pakhata ka inlan thei lo tur hi a pawi ka ti. Engtikah emaw chuan Miami Open hi khelh leh ngei ka inbeisei," a ti.

Grand Slam vawi 22 champion tawh Djokovic hian engtiang chena rei nge a chawlh a ngai dawn a la sawi lang tel lo. May thlaah French Open khelh tur a ni dawn, chumi hma chuan clay court lamah inbuatsaihna a neih hmasak a rinawm.