Nottingham Forest tan tlak a hnai - point an paihsak!

Premier League club Nottingham Forest dinhmun a derthawng zel - Premier League profit & sustainability rules an bawhchhiat avangin point li paihsak an ni a, table-ah 18-naah an tla thla!

Forest hi season hmasa khan an sum hman theih chin aia tam hmangah puh an ni a, hei vang hian hrem an ni. Premier League danah club-te chu kum khata an hloh theih chin bituk sak an ni a, Forest hian pound maktaduai 61 chiah hloh thei an nih laiin, an hloh theih zat aia tam an hlohna zat hi £34.5mtd a tling a ni.

Independent commission chuan uluk takin Forest hi a chhui a, point li paihsak turin an rel ta - point paihsak lo pawha him lo thei dinhmuna ding reng Forest tan hrem an nihna hi a 'na' a, Premier League aṭanga an tlak phah chuan pound maktaduai 100 chuang an chân phah dawn.

Forest bakah hian Everton chu November 2023-ah khan hrem an lo ni tawh bawk a, mahse, a tira point 10 paihsak an nih chu Merseyside club hian khingletin, point rukah tihhniamsak an ni.

Forest an lawm lo

Nottingham hian tun season-ah league match kua chauh khelh tur an nei tawh a, an hmabakah Tottenham Hotspur, Manchester City leh Chelsea an la awm bawk avangin an hma hun a thim hle - tla thei dinhmunah an ding.

An dinhmun ṭha lo belhchhah turin point li paihsak an ni a, tun season Premier League-a vawi ruk chiah la chak thei team tan chuan point li hi uiawm tak a ni. Forest hian na takin thuchhuah pawh an siam nghal.

Nottingham chuan, "Premier League thuneitute nen thla tam thlir ho chung leh, an thiltih apianga ṭha taka kan thlawp hnua hetiang hremna kan tawk ta mai hi kan beisei loh tawp a ni a, Premier League chunga kan rinna pawh an thaichhe hneh hle a ni," an ti.

Tun season-a manager pahnih nei tawh Forest chuan thutlukna chuan a tihhnual thu sawiin, "Keimahni ang thoa kal zel duh club tam tak a tinhnual tel a ni," an ti a, club tenau tan an hremna chu a pawi lehzual thu an sawi.

Buaina chu

Premier League danah chuan club-ten season thum chhungin £105mtd aia tam an hloh thiang lo a, season khatah £35mtd chiah an hloh thei tihna a ni. Forest bik hi an hloh theih zat hi £61mtd-ah tihsak an ni a, hei hi a chhan chu he dan hman mek enchhin a nih lai kum hnih chhung hi Championship lama an la khelh vang a ni.

English top flight league hian a tirah tak chuan Forest hi point riat paihsak a, point ruka tihhniam leh turin an rel. Hei hi a chhan ber chu point ruk an paihsak Everton aiin an tihsual hi 77% a a lian zawka an ngaih vang a ni a, Forest tan a 'na'.

Forest hian March 7 & 8 khan an thubuai ngaihtuahna hi an hmachhawn a, Premier League hremna chu anmahni dan siam nen pawh a 'na' lutuka an hriat thu an sawi a, leiba rulh theih loh vanga point paihsak theih pawh point kua chauh a nih laia an chunga hremna lek chu na an ti.

Hetihlai hian Premier League erawhin Forest lakah zahngaihna lantir an inti hle thung. Forest hi point ruk paihsak tur an ni a, point thum chu a tira an dan bawhchhiat vanga paihsak tur a ni a, a bak dang chu an dan bawhchhiat dan ena paih leh tur a ni. Mahse, Forest-in ṭha taka an thawhpui avangin point li chauh paihsak an ni.

A chhehvel

Forest hian 2020 leh 2021 khan kum khata £3mtd hloh ang an ni a, kum 2022 khan £40mtd an hloh a, kum 2023-ah £52mtd an hloh a, season thum chhunga an hloh zat hi a vaiin £95mtd vel a ni, tihna a ni.

May 2022 khan Forest hi Premier League khel turin an inpetkai a, nipui transfer-ah player 22 ngawt a ngheta la lutin, player panga chu loan-in an la bawk a, British football-ah transfer vawi khata player la lut hnem ber club record an siam.

Forest-in 2022-23 season chhunga player lakluh nana sum an sen zat hi £142.8mtd a tling! Nottingham hian player an hralh ve tho a, mahse, player an hralh zat hi pahnih chiah niin, pakua chu loan-in an chhuahtir a, player pahnih chu a thlawnin an chhuahtir bawk.

January khan Forest hi thubuai siamsak an ni a, Premier League chuan hetihlai hian thuchhuah siamin, "Forest leh Everton hian an dan bawhchhiat hi an pawm thlap a ni," an ti.

Beiseina thamral

Forest hian an thubuai laka chhanhim turin, infiamna khawvela ukil hriat hlawh tak Nick de Marco an ruai a, thiam an chan theihna turin point ruk tarlang mah se, heng zawng zawng hi Premier League chuan tling tawk loah a ngai vek a ni.

Nottingham hian nipui laia Tottenham Hotspur hnena Brennan Johnson an hralh chu inhumhim nan hman an tum. English forward hi £45mtd-in an hralh a, a man hi la sang leh thei tur a ni. Mahse, Johnson an hralh hian accounting deadline a pel tawh - Forest erawhin an hralh tlai hian sum an hmuh hnem phah niin an sawi ve thung.

Forest chuan Johnson hi Atletico Madrid chuan £42.7mtd-a lakluh tuma an dawr thu an sawi a, mahse, £55.6mtd-a lo zawrh letin, an indawr zui lo. Brentford-in £32.5mtd, £35mtd leh £40mtd-a lei an dilna chu an hnar vek bawk.

Johnson hralhna sum hi ngaihtuah tel ta se, Forest hremna hi nep theih dan a awm. Mahse, Premier League chuan tihnepna khawp tlingah a ngai lo a, Forest-a'n Johnson hralh an tihkhawtlai chhan chu dan bawhchhiat hlauh vang aiin sumdawnna rilru a nih thu an sawi.

Hrem hmabak

Forest hian Premier League profit & sustainability rules enchhin a nih lai, kum hnih chu Championship-a hun an hman avangin, an tan hremna tawrh a awl bik nia an sawi leh parachute payment an chhawr lo nia sawi chu Premier League chuan thu tling tawk loah a ngai bawk.

Premier League hian Forest hi a tira thubuai siamsak an pawm vang te, an tihsual chhui a nih chhunga ṭha taka an thawhpui avangte chauhin an hrem na lo. An ṭanna dang erawh an hnawl vek a, point li an chân.

Hetihlai hian Everton chu a vawi hnih nana hrem tuar thei dinhmunah an ding mek a, anni hi 2022-23 account chu enfiah sak niin, Premier League hian an hrem leh ngei a rinawm hle.

Manchester City pawhin dan bawhchhiat 100 chuang neiin, hrem hmabak mek an ni a, February 2023 khan independent commission kutah dah an ni tawh - Pep Guardiola hnuaia an ropuina tam tak hi chhuhsak an ni lo ang tih a sawi theih loh.