Klopp-a ân khum Reporter a lungawi
FA Cup quarterfinal-ah Liverpool-in an hmelma kumhlun Manchester United an ngam lo a, nomawi pali nena Anfield mangṭha tumtu Jurgen Klopp a lungawi lo hle - inkhelh zawha ngeiawm taka zawhna zawttu Danish reporter Niels Christian Frederiksen a ân khum a, mahse, Frederiksen chuan rilru nat phah nan a hman loh thu a sawi.
Klopp hian Viaplay reporter Frederiksen hi, "Eng dik lohna nge maw i neih le?" tiin thinrim takin a zawt let a, Danish reporter chuan camera tihtawp a nih hnuah pawh Klopp hi na taka a ân zui thu a sawi chhuak.
Frederiksen chuan, "TV-a lang lo lamah khan Klopp hi a ân chhunzawm a, kal pahin min ân khum a, a thinrim hle. Thil mak tak nia ka hriat avangin kei pawhin ka zui ve reng a ni," a ti a, thil thleng chungchang a sawi.
Klopp-a thinrimna ber hi Frederiksen-a'n United laka a team 'thatho' tawk lo anga a sawina chungchang a ni. German coach chuan, "I ngaihtuahna puthmang a dik lo a nih kha, nang chhang tur che hian thathona ka nei lo," a ti.
Frederiksen chuan, "United laka an tlawm dan khan amahah nghawng na tak a nei ni berin ka hria a, vawi hnih ngawt hmahruai hnua an tlawm leh khan a rilru a nghawng a, chumi hnu lawka khatiang zawhna ka pe kha a puak keh ta a ni ber.
"Mahse, ka hrethiam lutuk a, buaina ka nei lo. Nakin zelah pawh buaina kan nei lo ang. Nakinah kawm lehna hun ka neih pawhin, ṭhian ṭha tak kan la ni reng ang. Min huatna a neih ka ring lo a, kei pawhin ka haw lo," a ti.
Frederiksen chuan Klopp-a'n a pianhmang chungchanga a ṭawng el anga an sawi chu chhang letin, "Khati zawngin a sawi lo a, ka rih tur ang aia rit ka nih loh avangin chutianga sawi thu a awm lo bawk. Lo ni ta pawh ni ila, min hmusit zawngin a ṭawng lo ang - Klopp mizia a ni lo.
"Ka zawhna pek danah khan a lawm lo mai chauh zawk a ni a, thil dang a awm lo," a ti - Klopp hian season tawpah Liverpool a chhuahsan dawn a, Reds tan tun season-ah League Cup-a champion tawh.
Europa League quarterfinal a hruai thleng tawh a, Premier League champion an la beisei sang viau bawk. Nomawi pali chawi thei an nih laia uiawm taka United laka an tlawm hi Klopp hian a la na hle niin a lang.