Sarri thlaktu Igor Tudor

Lazio chuan an coach thar atan Igor Tudor an lakluh thu an puang a, an manager aṭanga bang ta Maurizio Sarri hmun ruak luahin Italian club hi a enkawl chhunzawm dawn a ni.

Kum 65 mi Sarri-a'n kar hmasa khan Lazio coach a nihna a bansan, tun hnaiah a zawna match ruk an tlawm hnuin mawphurtuah inngaiin a bang a, kar tawpa Frosinone nen an inkhelh ṭum khan assistant coach Giovanni Martusciello-a'n a enkawl.

Sarri thlaktu Tudor hi kum 45 mi a ni a, season hmasa khan Marseille a enkawl. France rama football inelna sang ber Ligue 1-ah Marseille hi pathumna a nihpui a, tun hmain Udinese leh Hellas Verona te a lo enkawl tawh bawk.

Croatian manager Tudor hna hi a hautak nghal dawn. March 30 hian Juventus an hmachhawn nghal dawn - Old Lady nen hian Italian Cup semifinal-ah pawh an inhmachhawn dawn bawk a ni.