NorthEast Olympic Games 2024 : Table Tennis mipa team-in Gold an la

3rd NorthEast Olympic Games 2024-ah Mizoram table tennis mipa team chuan team ṭha Assam hnehin gold medal an la a, singles leh doubles-ah medal an la beisei bawk. Mizoram team hi Jeho Himnakulhpuingheta (Lunglei Chanmari), Alberto LR Ruata (Mission Veng), Lalruatfela (Kolasib) leh Thangsiansanga (Nursery) te an ni a, coach Lalngainatawma (Tuikhuahtlang) leh manager C. Lalrinzuala (Mission Vengthlang) ten an ho a ni.

Mizoram hian group match-ah Assam 3-2 in an hneh lo a, mahse Tripura leh Nagaland te 3-0 ve vea hnehin final an lut ta tho. Semifinal-ah Mizoramin Manipur an hmachhawn a, 3-1 in an hneh. Group match leh semifinal hi March 19, Thawlehnia khelh a ni. Nimin chawhma khan final khelh a ni a, Mizoram hian group stage-a an hneh loh Assam hi 3-1 in an hneh let.

Assam an ṭha

NE Olympic hnuhnung berah Mizoramin Table Tennis aṭangin gold medal pali ngawt an hawn a, an che ṭha hle. Kuminah erawh hmeichhe team an tir thei lo a, mipa inelnaah gold pathum - team, singles leh doubles lak theih tur a awm.

Team inelnaah Meghalaya-a inelna neih ṭuma tel lo Assam an rawn tel tak avangin a harsa dawn tih a hriat theih a, ṭum dang zawng aiin Assam hi an ṭha zawk. Mizoram hian Assam hi an hneh lo ṭhin.

Assam aiawha telte hi Shankab Gautam Boruah, Saidul A Ahmed, Agniv Bhaskar Gohain leh Bhaskar Jyoti Sarmah te an ni a, sulhnu nei ṭha vek an ni. Team angin Assam an ṭha zawk.

Game plan a fuh

Mizoramin Assam an hmachhawn hmasak ṭumin Jeho-a vawi hnih a chak a, Mizo player dangte an chak lo. Lunglei Chanmari rawlthar Jeho Himnakulhpuingheta hi NE Olympic Games-ah hian ngam an awm lo a, set chhuhsak pawh an harsat. Jeho-a chu khingpui apiang hneh leh tura ngaih a ni.

Mizoram hian Assam an hneh loh ṭum ang lo takin Lalruatfela bul an ṭan tir a, Agniv a hmachhawn avangin chak lo mah se pawi an ti lo. Mizo tlangval hi Agniv lakah 11-5, 11-2, 11-4 in a chak lo. Jeho-a rawn lut ve lehin Shankab chu 11-9, 11-6, 11-2 in a rawn hneh a, harsatna a tawk lo.

Game thumna hi a pawimawh ta chiah a, hei hi result tidanglamtu tur chu a ni. Alberto LR Ruata rawn lutin Assam no. 3 Saidul a hmachhawn a, heta chak zawk zawk hi team anga chak tura ngaih an ni. Mission Veng tlangval hian set hmasa pahnih la mah se Saidul hian set hnih rawn la ve lehin set tawpna berah 10-6 in hma a hruai bawk.

TT-ah chuan 10-6 hnua inlehthal hi thil theih tawh loh tluka ngaih a ni a, mahse Alberto hian Mizoramin gold medal an lak theih nan thil theih loh ang hiala ngaih hi a rawn thei tlat. Alberto hian 13-11 in a rawn lehthal a, Mizo tlangval hi 12-10, 14-12, 8-11, 7-11, 13-11 in a chak.

Mizoram team game plan a fuh ta chiah a, match linaah Jeho rawn lut lehin academy-a a awmpui ṭhin Agniv chu 11-6, 11-9, 11-4 in an hneh.

Gold a hlu

3rd NE Olympic Games-ah Mizoramin medal an lak hmasak ber chu gold a ni a, Table Tennis hmangin an la. Mizoram manager Lalrinzuala chuan, "Assam hi team ṭha an ni a, chuvangin final-ah khan kan bum a ṭul. Lalruatfela bul kan ṭantir kha kan tifuh a, chutihrualin Alberto-a comeback kha a ropui bawk. Pathianin kan thawhrimna mal a sawm a ni," tiin Vanglaini a hrih.

Mizoramin medal an lakna tura player pawimawh Jeho chuan, "Agniv nen hian naupan lai aṭanga inzir ho kan ni a, ṭum tam tak kan inhmachawn tawh a, vawi khat chu min hneh ve tawhin ka hria. Hnehna chang turin ka inringtawk hle. Chutihrualin team angin Assam an ṭha zawk a, Alberto chak kha kan tan a pawimawh takzet a ni," tiin Vanglaini a hrilh.

Nizan khan Jeho leh Alberto ten doubles-ah final an khel a, result kan hre hman lo.