Badminton mipa team-in gold medal vaw chhuak

3rd NorthEast Olympic Games 2024-ah Mizoram badminton mipa team-in gold medal an la, final-ah Nagaland 3-1 in an hneh. Mizoram team hi Roger Lalthlamuana (coach) leh Vanlalrinawma (manager) ten an kaihruai a; gold medal latute hi Saitluangpuia Sailo, C. Lalramsanga, Joseph VL Ringngheta, C. Lalramzauva, Joseph Lalhruaitluanga, Lalrinawma leh Laldintluanga Tlau te an ni.

Mizoram Badminton Association (MBA) leh Tata Trusts ṭangkawpin hma an lak ṭhat zarah Mizoramin nasa takin badminton-ah hma a sawn a, NorthEast Olympic Games-ah a vawi khat nan gold medal an la.

Mizoram mipa team hian match hmasa berah team ṭha Arunachal Pradesh chu 3-2 in an hneh a, Arunachal hian singles-a seeded no. 1 pawh an kawl. Semifinal-ah Mizoram hian Assam 3-1 in an hneh leh a, Assam-ah hian Natonal-a senior ranking tournament-a pahnihna ni tawh a awm.

Final-ah Mizoram-in Nagaland 3-1 in an hneh a, singles-ah Saitluangpuia Sailo, C. Lalramsanga leh C. Lalramzauva ten an khingpui an hneh vek. Mizoram coach Roger chuan, "Naupangte thawhrimna leh Pathian malsawmna a ni. Mizoram tan theihtawp kan chhuah a, gold medal kan sual chhuak thei hi kan lawm hle," tiin Vanglaini a hrilh.

Mizoram hmeichhe team erawhin first match-ah Assam 3-2 in an hneh lo. Nimin tlai aṭang khan singles leh doubles inelna chhunzawm lehnghal a ni.