Vaivakawn tan Kawnpui an lian lua
Mahindra XUV3OO LPS Cup semifinal second leg-ah Vaivakawnin comeback ropui lantir tum mah se, an tan Kawnpui Jt. an lian hret a, 3-1 in an tlawm - inkhel pahnih belhkhawmah 5-1 in an chak lo a, Kawnpuiin final an lut.
Kawnpui tan goal khung khawl Lalkrossmawia'n goal hnih khungin, Albert Zohmingmawia'n goal khat a khung ve bawk a, Vaivakawn tana Emmanuel Ramengmawia goal khung chu mualpho zualpui khuhna chauh a ni.
March 22, Zirtawpni zan dar 8:00-ah LPS Cup final khelh a ni dawn a, Kawnpui Jt. hian Bethlehem Vengthlang hnehtu Sihphir Venghlun nen champion an inchuh ang.
Beiseina thamral
Semifinal first leg-ah Kawnpuiin 2-0 in Vaivakawn an hneh a, Aizawl team tan 'comeback' turin hmachhawp a hautak hle - a tir phat aṭanga goal khung tura nawr a ṭul a, mahse, goal an chuah hmasa zawk!
RG Stadium, Mualpuia inkhelah Albert-a a hnawksak nghal a, Ramdinzauva'n tihdan ṭha bera a hriat hmangin, Kawnpui forward hi a pawt tlu a, penalty a chawi - striker Krossmawia tan goal-a chantir turin harsatna a awm lo.
Si hnih phur sa Vaivakawnin si khat an phurh belh a, tlang tur a chiang hma, tiin a sawi theih. Kawnpui bawk an hmuhnawm zui a, mahse, H. Lallianmawia'n keeper Lalhruaizela chiah a hmachhawn hnuin goal pawnah a pet.
Beiseina thar
3-0 in Vaivakawn hnufual mah se an inthlahdah phah lo - first half tawp dawnah an corner aṭanga ball kal chu Kawnpui keeper Lalhruaitluanga'n nam chhuak mah se, penalty box pawn aṭangin R. Vanlalruatpuia'n a pet zui nghal a, goal hmaa ding Jehova Lalthangsanga'n a lo dang hlauh!
Kawnpui keeper Hruaia a talbuai zui - Benjamin Lalnunpuia lakah kut a thawh vangin minute 54-naah hnawhchhuah a ni a, Hruaia'n ṭul loah red card a chawi a, final a khelh theih dawn loh phah.
Player tam zawka khel Vaivakawnin beiseina thar an nei a, mahse, awmze nei erawhin Kawnpui an nawr thei chuang lo. Player tlem zawk mah se, Kawnpui an inthlahdah duh lo a, Lalengmawia freekick aṭanga ball kal chu minute 63-naah Mawitea'n tun inelnaa a goal sarihna ni turin a khung.
A tawp kharna
Vaivakawnin ball an thah rualin, an vawrh lut nghal a, bench aṭanga luhtir, Kawnpui keeper Lalnuntluanga Ralte a chesual zui. Ball man nghet thei loin a thlauh a, hei hi Emmanuel-a chuan remchangah lain, si phurh sut ṭhen nan a hmang.
Vaivakawnin beiseina tlem an nei zui a, mahse, rei lo têah Vaivakawn beiseina zawng zawng chu Albert-a'n hmeh mih sakin, minute 76-naah an goal thumna a khung zui.
Vaivakawn beiseina a thamral a, a tam zawk an nih hnuah pawh goal hnih an chhuah miau avangin dem tur dang an nei lo. Minute 84-naah Moody Lalawmpuia'n a yellow card pahnihna a hmu zui a, Vaivakawn beiseina a thamral a, Kawnpui an chak.