India U23-ah Isak & Mark

Malaysia Under-23 nena friendly match khel tur, India Under-23 squad chuan nimin khan Kuala Lumpur, Malaysia panin India an chhuahsan a, Blue Tigers rawlthar rual zingah hian Odisha FC forward Isak Vanlalruatfela leh Hyderabad FC midfielder Mark Zothanpuia te an tel.

India U23 hi NorthEast United FC assistant coach Naushad Moosa chuan a enkawl a, squad hi March 14 khan puan a ni a, player 26 koh phawt an ni. March 15 aṭang khan training neih ṭan niin, Nilaini zan khan player pathum chu paih leh niin, player 23 zingah Mizo tlangval pahnih an tel.

Blue Tigers U23 hian Malaysia U23 nen hian friendly match vawi hnih an khel dawn a, March 22, Zirtawpni zan dar 7:30-ah match hmasa zawk khelh niin, March 25, Thawhṭanni zanah match hnihna khelh a ni ang. Inkhel hi entu awm loa khelh tur a ni a, television leh online kaltlanga enna tur a awm dawn lo.

Isak leh Mark hi age level-ah pawh India tana vawi khat koh an nihna a ni a, Blue Tigers tana koh an nih vawi khatnaah Under-23 tan an khel nghal dawn - an thlen chin hi a ropui hle.

Odisha tana season duhawm tak hmangtu Isak hi international break-a World Cup qualifier khel tur India senior team probable squad-ah pawh koh a ni a, mahse, Thingsulthliah/Bawngkawn tlangval hian hmun a chan theihna tura beisei sang zawk Under-23 squad zawm hi a thlan thu Vanglaini a hrilh - duh a thlang sual lo.

Isaka hian tun season inelna hrang hrangah match 30 khelin goal nga a khung a, assist vawi li a nei bawk - tun season-ah Indian forward 'hot' ber pawl a ni mek a, hmabak a nei êng hle.

Serchhip tlangval Mark Zothanpuia hian tun season ISL-ah match 15 Hyderabad tan a khel tawh a, assist vawi khat a nei. Chanmari FC midfielder hlui hian Hyderabad-ah hmun pawimawh a chan phak avangin Under-23 probale squad-ah koh a ni a, player 23 zingah pawh a tel leh ta.

Player pathum tel ta lote hi Santosh Trophy-a Manipur tana inlan Sanathoi Meetei, Army Red forward Samir Murmu leh Chennaiyin forward Irfan Yadwad te an ni.

India U23 squad

Goalkeepers: Arsh Anwer Shaikh (Mohun Bagan SG), Prabhsukhan Singh Gill (East Bengal), Vishal Yadav (Jamshedpur FC)

Defenders: Bikash Yumnam (Chennaiyin), Chingambam Shivaldo (Bengaluru), Hormipam Ruivah (Kerala Blasters), Narender Gahlot (Odisha FC), Robin Yadav (Bengaluru), Sandip Mandi (Inter Kashi)

Midfielders: Abhishek Suryavanshi (Mohun Bagan SG), Brison Fernandes (FC Goa), Mark Zothanpuia (Hyderabad FC), Mohammed Aimen (Kerala Blasters), Thoiba Singh (Odisha FC), Vibin Mohanan (Kerala Blasters)

Forwards: Abdul Rabeeh (Kerala Blasters), Gurkirat Singh (Mumbai City), Isak Vanlalruatfela (Odisha FC), Ninthoinganba Meetei (Chennaiyin), Mohammed Sanan (Jamshedpur FC), Parthib Gogoi (NorthEast United), Sivasakthi Narayanan (Bengaluru), PV Vishnu (East Bengal)