Mizo tlangval a champion

International Martial Arts Games vawi ruknaah, Mizo Muaythai fighter chhuanvawr Joseph Vanlalhruaia a champion. Mizo leh India ram huapah World Muaythai Organization (WMO)-a title belt la thei hmasa ber a ni.

Bangkok, Thailand-a inelna neihah Vanlalhruaia hi -51kg huangah a inlan a, Hunthar Veng tlangval hian a khingpui Taiwan mi Yeh Lichih chu fourth round-ah technical knockout hmangin a hneh.

Joseph Vanlalhruaia hi Junior level aṭanga India huap inelna liana gold medal lo la tawh ṭhin niin, kum 2022 khan LPS Pro Muaythai-ah champion a ni tawh a, 2019 Asian Muaythai Championship-ah khan India tan silver medal a lo la tawh.

Mizoram leh state hrang hrangah Muaythai zirtirtu hna a thawk kual a, tunah hian Kerala-ah a awm mek a ni. Muaythai Association of Mizoram chuan Mizo tlangvalin hlawhtlinna sang tak a chang hi an lawmpui thu an sawi.