Thil mak beiseitu Luxembourg

Luxembourg tan an ram football zinkawng hi a awlsam lo asin, chak lo mai pawh ni lo nasa taka chak lo tura ngaih an ni ṭhin. Tunah erawh thil a danglam chho zel a, mak tak maiin Euro 2024 khelh beisei zingah an la tel phak.

Zanin dar 10:30 hian Euro 2024 playoff-ah Luxembourg hian Georgia an tum dawn. Path C inkhel dangah Greece leh Kazakhstan an inhmachhawn dawn bawk, a chak zawk ve ve hi final-ah an inhmachhawn leh ang, chuta chak chuan Euro 2024 an khel dawn.

Kum 1982 Dcember 15 kha a ni a, thli thaw leh hnawng tak karah Luxembourg chu England nena European Championship qualifying khel turin Wembly Stadium an pan a, striker Luther Blissett-a hattrick hmangin Three Lions 9-0 in an chak.

England nen an intawn hnuah hian international football-ah Luxembourg hian chuan tur an nei ngai lo, kum 2008 thleng kha chuan World Cup leh Euro qualifying khel ve reng chung sia a tling lo rei record te an siam hial, tunah chuan an beisei ngam loh kha an beisei thei mek a ni.

Luxembourg Football Federation president Paul Philipp chuan, "Ram lian leh ropui dangte angin kan tling tlang nghal kher lo a ni mai thei, mahse duhthusam leh beiseina chu kan nei thiang a, chu chu kan hre reng tur a ni ang.

"European champion nihte hi theih ni se la chuan kan duhthusam a ni a, mahse chutiang chu awlsam taka nih theih a ni ngawt lo. A lawmawm lai chu ram team ṭha leh hmuhnawm tak kan nei thei ta hi a ni," a ti a, an khingpui tur Georgia lakah pawh ṭha taka an khelh ngei a beisei.

Tun hnaia nasa taka hma an sawn theih chhan chu coach Luc Holtz a ni. Kum 2010 khan Holtz hi coach atan ruat a ni a, tun dinhmunah chuan khawvelah ram team ngai enkawl rei ber dinhmun chelh mektu a ni hial.

Player a nih laia ram tana match 55 kheltu Holtz chuan, "Hna ka thawh tirh khan thil thlak danglam hlawk duh ka nei a, chu chu player-te rilru puthmang kha a ni. Theihna sang tak nei mah ila kan rilruin a ngam loh chuan a hlawhtlin theih loh, zawimuangin kan inthlak danglam chuan ka hria," a ti.

Path A playoff khel tur zingah Poland an tel. Player ṭha bik Robert Lewandowski awmna team hian zanin dar 1:15 hian Estonia an tum dawn, an chak a nih chuan Wales leh Finland inkhela chak zawk an la hmachhawn leh ang.