Alonso hi chu a danglam bik - Grimaldo

Bayer Leverkusen left back Alex Grimaldo chuan coach Xabi Alonso chu a Coach lo hrawn tawhte lakah a danglam bik thu a sawi a, Spanish Coach lakluh tuma hel mektu Liverpool tan hriat a nuam khawp ang.

Barcelona academy chhuak, Benfica tana season riat zet lo khel tawh Grimaldo chuan, "Ka career-ah coach ṭha tak tak, Barcelona leh Benfica-ah te ka lo hrawn tawh a, mahse, Xabi hi chu a danglam bik a ni. Football khawvelah hian ani ang coach hi an tam lo," a ti thlawt!

Grimaldo chuan sawi chhunzawmin, "Bundesliga nomawi kan chawi a nih chuan a nuam khawp ang. Leverkusen-in an la chawi ngai miah loh nomawi, ka season khatnaah ka chawi nghal thei dawn a nih chuan a lawmawm dawn em asin.

"Kei chauh ni lo, team pumpuiin hei hi chu a thlen ngei kan duh a, kawng dik kan zawh mekah ka ngai bawk," a ti - Leverkusen hian league match 26 khelh tawhah tlawm an la nei lo a, vawi 22 chakin, vawi li draw an nei.

Bundesliga table chung ber luah mekin, anmahni hnaihtu Bayern Munich aia an sanna hi point 10 lai a ni a, league match riat chiah khelh tur a awm tawh bawk avangin an tan champion a hnai hle.

Spanish defender Grimaldo hian Alonso hnuaiah season a hmang ṭha hle. Inelna hrang hrangah match 37 khela goal 11 khungin, assist vawi 15 ngawt a nei tawh - Alonso a fak hi a mak hran lo.

Liverpool hian Alonso bakah Brighton & Hove Albion coach Roberto De Zerbi pawh an beisei nia sawi a ni a, tun hnaiah Ligue 1 club Lens enkawltu Franck Haise hming lam rik a ni ve leh ta bawk.

Season hmasaa Ligue 1 Manager of the Year atana thlan Haise hian season hman zawh takah khan Lens chu Ligue 1-ah pahnihna a nihpui a, champion Paris Saint-Germain chu point khat chiahin an phak lo - tun season-ah table-ah parukna dinhmun an luah mek a, palina Lille chu point khat chiahin an phak lo mek.