A lo kirnaah Halep chak lo

Damdawi hman phal loh a hman vanga an hrem hnuah Simona Halep a inkhel leh thei ta a, hun rei tak hnua match a khelh lehna hmasa berah Halep hian Paula Badosa a ngam lo.

Thawhlehni zan Miami Open khelah Halep hian bul a ṭan fuh, harsa lo takin set khatna chu a la. Mahse, set thum an khelh zawh meuh chuan 1-6, 6-4, 6-3 in a chak lo zawkah a ṭang.

Kum 32 mi Halep hi nikum tawp lam aṭang khan hrem a ni a, a tirah chuan kum li chhung atan an hrem. Mahse, infiamna lama thubuai ngaihtuahtu sang Court of Arbitration for Sport (CAS) hnenah a zualko a, hrem a nihna hi thla kua atan a pawt tawi a ni.

Romanian nula Halep hian hrem a nih chungchangah dan a bawhchhiat loh thu leh thil tihsual palh vang mai a nih thu a sawi fo a, taksa tih chak theihna damdawi a thisena an hmuh chu CAS lam pawhin tihluih vang nia an hriat loh avangin hremna hi an tinep.

Hetih lai hian Emma Raducanu erawh a inkhel thei lo. Britain nula hi a hnungzâng hnuai lam na vangin Miami Open aṭang hian a inhnukdawk a, engtianga rei nge a chawlh a ngaih dawn tih erawh hriat a la ni lo.