Klopp kan be lo ang - Bayern Director

Bayern Munich director of sport Max Eberl chuan season tharah Coach thar la lut dawn mah se, Liverpool chhuahsan tur Jurgen Klopp an biak loh tur thu a sawi a, hetihlai hian AS Roma ban hlim Jose Mourinho tan erawh kawng a hawng.

Eberl chuan, "Kloppo khan, 'Thathona ka nei tawh lo a ni,' tiin Liverpool a chhuahsan tur thu a puan khan a sawi a, kei pawhin a rilru puthmang leh a awm dan tur chu ka lo tawn tawh thil a nih avangin ka hria. Chuvang chuan Kloppo hi ka be dawn lo," a ti.

Bayern hotupa Eberl chuan Jose Mourinho chungchanga an zawhna chu chhangin, "Coach zinga hna nei lote pawh kan thlithlai a ni," a ti a, Portuguese coach chu an ngaihven zinga a tel thu a sawi.

Eberl chuan, "Manager 40 em em chu kan list-ah an awm lo a, mahse, manager pali aia tam chu kan ngaihven chiang. Kan list-ah hian inrin loh tak pawh an awm ang," a ti a, season tawpa chhuak tur Thomas Tuchel hmun ruak luah tur zawn nan list an siam thu a sawi chhuak.

Bayern coach tur hian Bayer Leverkusen coach Xabi Alonso, Real Madrid manager hlui Zinedine Zidane, Manchester United boss hlui Ole Gunnar Solskjaer leh Mourinho te hming lam rik vek a ni a, season thara German club enkawl tur hi hriat a châkawm ta hle.