Courtois a inhliam nawn

Hliam vanga hun rei tak chawl tawh Real Madrid goalkeeper Thibaut Courtois chu a inhliam nawn leh ta. Belgium international hian training a zawm leh tawh, mahse Thawhlehni khan training neih laiin a inhliam.

Nikum August thla khan Courtois hi a khup vei lam a hliam, a hnu lamah a la inkhel leh lo. Tun ṭumah hian a khup ding lam a hliam leh thung, a chawlh chen tur tak hriat theih la ni lo mah se thla khat aia rei chu a chawlh leh rih a ngai dawn.

Real Madrid chuan thuchhuah siamin, "Thibaut Courtois a hliam chu endik a ni a, a khup ding lam chhungrilah a hliam," an ti. La Liga bakah Champions League lama hlawhtlin tum Spanish club tan chanchin lawmawm lo a ni ang.

Tun hnai khan Real manager Carlo Ancelotti chuan Courtois leh Brazil defender Eder Militao te hliam dam chho ta chu lawmawm a tih thu a sawi a, mahse a beisei angin UCL-a Manchester City an hmachhawn hunah chuan Courtois a hmang thei dawn ta lo niin a lang.

Kum 2022 Champions League final-ah khan Courtois hi player of the match atana thlan khawpin a khel ṭha. Liverpool goal khung tur vawi kua ngawt dansakin Real Madrid chu a vawi 14 nan a champion pui a ni.