Partey hoa 'Party' tum Arsenal

Arsenal chuan hun rei tak chhung an rim tawh Thomas Partey chu Atletico Madrid aṭangin an lalut, an midfielder mamawh tak seng lut tur hian Spanish club hnenah pound maktaduai 45.3 an theh chhuak.

Kum 27 mi Partey-a'n contract a ziah rei zawng hi hun rei tak chhung atan tih bak chuan chiang taka tarlan a ni lo. Kar khatah £250,000 a hlawh dawn a, Gunners player hlawh hnem pali Pierre-Emerick Aubameyang, Mesut Ozil leh Willian te zingah a tel phak dawn.

Nipui bazar tawp nia Ghana mid-fielder an lakluh laiin Lucas Torreira chu Atletico-ah hian season khat chhung atan loan hmangin a kal thung a, rawlthar Matteo Guendouzi pawh Hertha Berlin lamah loan bawkin an kaltir.

Gunners hian Brazilian defender Gabriel Magalhaes chu Lille aṭangin an lalut tawh a, an elpui Chelsea tana contract hmang zo Willian an lak bakah loan hmangin Dani Ceballos an hawh nawn, sum harsa tak karah an bazar ṭha tawk viaua ngaih a ni.

Arsenal leh Thomas Partey te hian ri ret ret an neihna a rei tawh, tun hnai maia in melh chawp an ni lo. Gunners hian 2014 khan Atletico aṭanga Almeria tana loan hmanga a khelh laiin an lo thlithlai daih tawh.

Arsenal scout Francis Cagigao chuan khatihlai khan Arsene Wenger hnenah an team tana ṭha tur a nih thu a sawi tawh a, a hnuah manager Unai Emery khan La Liga lama a hriat tawh midfielder hi a tharum, thiamna leh finna chu a duhzawng a nih thu a sawi bawk.

Thawm a awm a, mahse a ring lem lo. Arsenal-in langsar taka Partey an ngaihvenna chu 2018 kha a ni. North London club hruaitute leh Partey-a aiawhte chu 2019 April thla khan Highbury House-ah an inbia a, Partey-a'n a duh chu kar khata £250,000 bawr hlawh a ni.

Khatih hunlai khan Gunners lamin a hlawh phut zat an pe ngam lo, transfer lama thuneitu Raul Sanllehi chuan Wilfried Zaha lam a hawi a, rin loh takin Nicolas Pepe a lalut leh daih lawi si! Dani Ceballos chu loan hmangin a hawh bawk.

Ghana international hian Atletico Madrid tan June, 2023 tawp thleng contract a nei, a contract a an ziah dan chuan club dangin an lei duh a nih chuan pound maktaduai 45-in an lei chhuak thei ang tih an ziak tel - sum a awm a, amahin a duh bawk chuan lei theih a ni.

Covid-19 vangin sum a harsa a, mahse player mamawhna a sang bawk si. Arsenal hian Lyon midfielder Houssem Aouar pawh lakluh an duh, mahse a man atan an phal zat chu pound maktaduai 35 a ni - Ligue 1 club lamin an player hlutna chhutin an dawrna hi tlawm an ti lutuk a, an hralh phal lo.

Arsenal technical director Edu-a'n a ṭhianpa Lyon sporting director Juninho Pernambucano chu ngenngawl takin a bia a, mahse sum an theh chhuah phal zat a tlem miau avangin an inrem thei lo. Sum harsa karah an neih ang an hman dawn ro ro chuan Aouar aiin Partey tan an seng huai zawk tihna a ni.

Thawhṭanni kha nipui bazar tawp hun a ni a, Thawhlehni zing dar 3:30 thleng hun a awm. Thawhṭanni tlai, keini ram lama khaw thim dawn hnai tawhah Arsenal hian thapui thawhin Partey lakluh an tum tih thawm chu media lamah a darh thar huk a, zanreiah inremna an nei fel nghal.

Arsenal tana Patrick Vieira, Man-chester United tana Roy Keane leh Chelsea tana Claude Makelele inkhel hmu phak chin Arsenal fans chu Thomas Partey an lakluh avangin an lawmna a sang zual - an captain hlui Vieira nena khaikhin nghal chi ni lo mah se beiseina an nei sang.

6 ft 1 in a sang midfielder hian tharum a ngah a, ball kang a la theiin a che rang bawk. Tlarhnung leh tlarhma lam thlunzawmtu pawimawh a ni ṭhin a, goal venhim kawngah defender tha ti chak thei tur chi a ni. Ball pass thiam a nihna hi Arteta-a'n a duh chhan langsar nia sawi a ni bawk.

Arsenal manager Mikel Arteta chuan, "Thomas hi hun rei tak chhung kan ngaihven tawh, ani ang player theihna sang tak nei kan squad-a kan lalut thei hi a lawmawm takzet. La Liga leh Champions League thlenga tawnhriat nei ṭha a ni a, inelna sangah a rintlak hle ang," a ti.

Partey hi Granit Xhaka, Mohamed Elneny leh Dani Ceballos te nen Arsenal midfield laia khelhna hmun inchuh tur an ni. Chutihrualin Partey erawh a sulhnu leh theihna en chuan player awmsa te nek chhuak tura ngaih a ni a, a lakah beiseina a sang bawk ang.