Zhang hnehtu Kvitova

Wimbledon vawi hnih champion tawh Petra Kvitova chuan Thawhṭanni zan khan Zhang Shuai a hneh a, Czech Republic nula hian 2012 hnua a vawi khat nan French Open quarterfinal a lut.

Suzanne Lenglen Court a inkhelah Kvitova hian darkar khat leh minute 25 chhungin 6-2, 6-4 in hnehna a chang, hun rei tak hnuah major tournament quarterfinal a thleng leh thei chu a lawm thu a sawi.

Kum 2017 khan Kvitova hi a chenna ina a awm laiin misualin an bei a, chemte in a ban an zai thlersak - a hliam hi zai niin hun rei tak a chawlh hnuah 2018 khan tennis a khel leh thei chauh.

World number 11 Kvitova chuan, "Thil engkim mai hi a ṭha zawngin a kal ve leh mek tawh, tunah chuan hun rei tak hnuah tennis avangin hlimna ka tawng ve leh mek a ni," tiin hun harsa a paltlang thu a sawi chhuak.

Last 16 inkhel dangah Australian Open champion Sofia Kenin chuan tualchhung nula Fiona Ferro chu 2-6, 6-2, 6-1 in a lo hneh ve bawk a ni. American nula Kenin hian a match lehpekah chuan Ons Jabeur leh Danielle Collins inkhela chak zawk a hmachhawn ang.