Quarterfinal-ah Djokovic a lut

Novak Djokovic chuan Karen Khachanov hnehin French Open quarterfinal a lut. Paris khawpuiah hian season 11 chhung chu a zawnin a thiam pariat zingah hian a tel ziah, zaninah Pablo Carreno Busta nen semifinal hmunruak an inchuh leh ang.

Greek tlangval Stefanos Tsitsipas pawhin last 16 a paltlang a, seeded pangana hian Andrey Rublev a hmachhawn leh dawn - a chak tluang zel a nih chuan semifinal-ah Djokovic nen an intawng dawn a ni.

US Open-ah khan Djokovic-a'n line judge chu ball a vuak per a, an disqualify phah. Thawhṭanni zan French Open last 16 inkhelah pawh Novak hian line judge luah ball a vuak per palh a, tun ṭumah erawh hnawl a ni ta lo.

Serbian star hian Kha-chanov-a ball vuak lo vuak let a tumna lamah line judge hi a vuak per palh, tih luih a nih loh avangin an hrem lo. Darkar hnih leh minute 23 an inkhelh chhungin 6-4, 6-3, 6-3 in hnehna  a chang.

World number 1 Djokovic chuan, "Mi tam tak pawhin an lo tipalh ve tawh ṭhin. Hmanni lawk khan New York-ah ka chesual a, tuna ka vuak per palh leh mai hi a makin ka hrilhhai zawk hle," tiin a inthiam loh thu a sawi.

Inkhel dangah Stefanos Tsitsipas chuan seeded 18-na Grigor Dimitrov lakah 6-3, 7-6 (11-9), 6-2 in hnehna a chang, season dangah clay court hmangthiam viau lo mah se kuminah erawh a khel ṭha tluang viau.

Tsitsipas-a hmachhawn leh tur seeded 13-na Rublev pawhin inkhel inhnehtawk takah Marton Fucsovics chu 6-7 (4-7), 7-5, 6-4, 7-6 (7-3) in a lo hneh ve bawk. Quarterfinal-ah chuan Hamburg Open ang bawkin Rublev-a'n Tsitsipas hneh a tum ang.

Kum 22 mi Tsitsipas chuan, "Mahni inven a pawimawh rualin khungpuite nawr let hi kei chuan ka dahsang ṭhin, tun ṭumah pawh khan ka chakna chhan niin a hria. Ka match khelh leh turah pawh ka nawr chhunzawm ang," tiin attacking game a ngainat thu a sawi.