Zaninah champion tum Kawnpui vs Sihphir Venghlun

Mahindra XUV3OO LPS Cup final chu zanin dar 8:00 hian khelh a ni dawn ta a, Sihphir Venghlun leh Kawnpui Jt. te an intawng dawn. Team pahnih hian champion an tum thu an sawi ve ve a, inkhel hmuhnawm beisei rawh.

RG Stadium, Mualpuiah final hi khelh a ni dawn a, Sihphir Venghlun leh Kawnpui lamah chuan titi dang a leng meuh lo - veng leh khua whatsApp group-ah chuan LPS Cup bak sawi tur an hre tawh lo!

Final boruak sang a nih tawh dawn avangin zaninah pawh fans ngah zawk tan chance a ṭha ang tih a chiang a, RG Stadium-ah thawm a ring dawn.

Thawnthu thar

Aizawl DFA hnuaiah inter-village football hi kum 2013 aṭang khan khelh ṭan niin, vawi sarih ngawt inelna hi neih a ni tawh - Aizawl khawpuiin inelna an thunun a, Ramhlun South chu vawi thum champion tawh niin, Armed Veng (2), Chhinga Veng (1) leh Bethlehem Vengthlang (1) an champion tawh bawk.

A tawi zawnga sawi chuan, ADFA hnuaia veng leh khua inelnaah Aizawl pawn an la champion ngai lo. Zaninah Sihphir Venghlun leh Kawnpui an intawng dawn a, a vawi khat nan Aizawl khawpui pawn champion kan hmu dawn - thawnthu thar ziahin a awm dawn a, team pahnihin a chungnung zawk nih an tum ve ve ang.

YMA football inelna vawi 21 neih tawhah kum 2006 khan Lengpui an champion a, Aizawl pawn champion awmchhun an la ni. MFA-in 2022-a khua leh veng inelna a buatsaihah erawh Champhai Kananin final-ah Sialhawk hnehin an champion.

Kawnpui an ṭha

Mizo coach lar K. Malsawmkima'n Kawnpui a enkawl a, nomawi aia hniamah lungawi a tum lo. I League-a Aizawl FC lo hruai thleng tawhtu Mala chuan, "Champion kan tum a, chumi tur chuan kan inbuatsaih. A aia hniam kan ngaihtuah lo," tiin Vanglaini a hrilh.

Mala chuan, "Sihphir Venghlun hi team ṭha tak an ni tih ka hria a, mahse, hneh a, champion nomawi chawi kan tum," a ti. Kawnpui hi match hmasa berah an bye a, last 32-ah Ramhlun Sports Complex chu 4-1 in an sawp zui.

Round of 16-ah champion beisei ngam Salem Veng chu 3-1 in an hneh a, quarterfinal-ah Armed Veng 1-0 a an petchhuah zui avangin an inringtawk hle. Semifinal-ah meuh pawh he team hian harsatna lian tham an tawk lo a, inkhel pahnih belhkhawmah Vaivakawn chu 5-1 in an sawp!

Tawnhriat

Kawnpuiin inelna ṭantir aṭang rengin nomawi an beisei a, champion nomawi chawi tur khawp player an neih vang a ni. Aizawl FC forward hlui Albert Zohmingmawia'n a la ho thei a, Vaivakawn laka a inkhel kha an en chuan Sihphirin ngaihthah a thiang lo tih an hria ang.

Lawngtlai aṭanga Kawnpuiin an lak, striker Lalkrossmawia'n a hna a hrechiang a, tun inelnaah goal sarih a khung tawh! Churachandpur tlangval Jehova Lalthangsanga leh Hnahthial tlangval Lalrintluanga te pawimawhna sawi hmaih chi a ni lo a, best player nominee zinga mi Joseph Lalrinawma hi theihnghilh lo la.

Santosh Trophy-a Mizoram tana feh chhuak thei Lalengmawia an la nei cheu bawk a, Kawnpui player-ten tawnhriat an nei ṭha.

Semifinal second leg-ah Kawnpui keeper Lalhruaitluanga'n ṭul lo takin red card a chawi a, mahse, Aizawl FC keeper Vanlalhriatpuia an chhawr theih dawn avangin Kawnpui an vannei takzet.

Hei le Sihphir

Inelna ṭantirah khan champion tur rinkai hming tlar ta ila, Sihphir Venghlun an tel lo mai thei - mahse, tunah chuan he team hian final an lut a, semifinal-ah team ṭha Bethlehem Vengthlang chu inkhel pahnih belhkhawmah 5-2 in an hneh thei.

Sihphir manager Lalrinchhana chuan, "Final luh hi kan beisei sa a, a tirah pawh final beisei ngam lo chu practice ve tawh lo mai turin kan inti hial. Kan indahsan lam a ni lo a, rilru tih paukhauh kan duh a ni. Team ṭha tak hnehin final kan lut a, zaninah team ṭha ber kan hmachhawn dawn," a ti a, Kawnpui hneh a châk.

Sihphir coach K. Lalruattluanga chuan, "A tikimtu mai nih kha kan tum lo a, champion duhna thinlung kan player-te rilrua tuh kan duh ber. Champion turin theihna kan nei a, team ṭha tak ni mah se, hneh kan tum ang," tiin Vanglaini a hrilh.

Thawhhona

Sihphir Venghlunin Kawnpui angin player langsar an nei tam lo a, mahse, an thawhhona ṭha chu an chhuan a ni - football tuichilh tak veng hian ADFA hnuaiah first division club an nei a, tuna an player-te hi club tana khel ho ṭhin an nih avangin an inhrechiang a, an inman tawn hle.

Hei tak hi Kawnpui tan a harsa tur lai a ni dawn a, zaninah inkhel a hmuhnawm dawn. Sihphir hian round of 16-ah champion beisei Republic Veng an hneh a, quarterfinal-ah meuh pawh 4-0 in Thenzawl an sawp - semifinal-ah BVT an hneh zui.

Sihphir tan tlarhnungah centre back Lalruatsanga a pawimawh leh dawn a, Joseph Lalṭhafela mawlh hi Kawnpui tana ven uluk ngai tur a ni - BVT laka hnawksak em em Malsawmtluanga Pautu pawhin awm mai mai a tum lo ang tih a chiang a, goal ruk khung tawh Ricky Lalramnghaka hi ven bik ṭul tur a ni.