Jeho-a'n gold medal a la

Jeho Himnakulhpuingheta chuan Manipur tlangval Khelendrajit Yenkhom chu 9-11, 11-7, 11-6, 11-8, 11-9 (4-1) in a hneh - Mizo tlangval hian 3rd NorthEast Olympic Games 2024 khelh laiah gold medal a vaw chhuak.

Nagaland khawpui Kohima-a inelna neihah Jeho-a hian semifinal-ah Mizoram aiawhtu pakhat zawk Alberto LR Ruata a hneh a, Mission Veng tlangval Alberto-a hian bronze medal a la ve bawk a ni.

Mipa doubles huangah Jeho-a leh a ṭhianpa Alberto te hian final an lut bawk a, mahse gold medal inchuhna inkhelah a vanduai zawk an ni a, silver medal erawh an hlawh chhuak phak tho.

Jeho-a chuan, "Mizoram tana gold medal lak chu a lawmawm dan hi a danglam bik ṭhin. Tun ṭumah pawh hian ram tan theihtawp ka chhuah a, a tawpa hlawhtlinna ka chang thei hi ka lawm takzet a ni," tiin Vanglaini a hrilh.

Final-a a hneh tak Khelendrajit Yenkhom-a nen hian team inelna huangah an lo intum tawh a, an intawn hmasakah Jeho-a hi 3-0 in a chak - singles huanga an intawn lehnaah set la hmasa mah se Mizo tlangval bawk a tawpah a dingchang leh ta a ni.

Mizoram Table Tennis team hian NE Games-ah hian team inelna huangah gold medal an lo la tawh bawk; TT huangah bik gold medal pahnih, silver medal leh bronze medal pakhat ve ve an la ta a ni.