Boxer parukin final an lut

3rd NorthEast Olympic Games 2024-ah Mizoam aṭangin boxer parukin final an lut. Final lutte chu mipa-ah Lallawmawma, Lalkhawngaiha, Malsawmtluanga leh C. Lalduhawma te an ni a, hmeichhe lamah Naom Chingsannuam leh TC Lalremruati ten final an lut ve bawk.

MIZBA-in tun ṭum inelnaah hian boxer 17 a tir a, heng zinga 13 (mipa 8, hmeichhia 5)-in semifinal an lut. Boxer pasarih ngawt semifinal-a an chak loh avangin bronze medal-ah an lungawi a ṭul.

Mizoram tana bronze medal latute chu mipa-ah K. Vanlalhriatchhunga, Abednago VL Dinpuia, Frankie H. Vanlalruatpuia leh Malsawmkima te an ni a, hmeichhe lamah Vanlalrinngheti, Rudy Lalhmingmuani leh Abisak Vanlalmawii te an ni.

Vawiin chawhma dar 11:00 aṭangin final hi khelh a ni dawn a, inkhelh dan tur indawt hi an la tichhuak lo. NE Olympic Games hi SportsCast India YouTube Channel-ah a en theih.

Mizoram boxing team hian tun ṭum inelnaah hian medal 13 zet la dawn mah se inelna hnuhnung ber aiin an che ṭha lo zawk. Meghalaya-a NE Olympic Games neih a nih ṭum khan Mizoramin boxer 17 an tir a, medal 16 an hawn. Boxing-ah Mizoramin gold panga, silver pasarih leh bronze pali an la a, record an nei ṭha hle.

Chutihrualin kumina final lut mi parukte hian hnehna an chang vek a nih chuan kum 2022 aiin kuminah gold medal an la hnem thei thung. Boxing-ah medal a tam avangin Mizoram dinhmun tih ṭhat nan a pawimawh hle.