Malaysia kan huphurh lo - Isaka

India Under-23 chuan zanin dar 7:30 hian Malaysia U23 nen friendly match hnih an khelh tura match hmasa zawk chu an khel dawn a, Blue Tigers forward Isak Vanlalruatfela chuan Malaysia an huphurh loh thu Vanglaini a hrilh.

Thingsulthliah/Bawngkawn tlangval chuan, "Ka huphurh hran lo. Team ṭha tak chu an nih hmel a, mahse, theihtawp kan chhuah ve a ngai a ni mai. Zep thu a awm lo a, duh angin inbuatsaihna erawh kan nei lo.

"Delhi-ah ni li vel inpuahchahna hun kan nei a, Malaysia-ah ni khat bak hun kan nei lo. Anni ang team ṭha tum tur chuan hun kan hmang ho tam tawk lo. Mahse, theihtawp kan chhuah ang," tiin Vanglaini a hrilh a, an zir ang angte chhawr ṭangkai an tum thu a sawi.

India U23 squad-ah hian Odisha forward Isak-a bakah Hyderabad midfielder Mark Zothanpuia chu Mizo player awm a ni a, NorthEast United FC assistant coach Naushad Moosa enkawl India U23-ah hian Mizo player pahnih an awm tihna a ni.

India hian March 25, Thawhṭanni zanah match hnihna an khel leh dawn a, inkhel hi entu awm loa khelh tur a ni a, television leh online kaltlanga enna tur a awm dawn lo.