Man United leh Sancho an inhnaih lo Cavani, Telles, Dialo leh Pellistri an lalut thung

Manchester United-in transfer tawp niah thawm an nei lian ber a, an duh ber Jadon Sancho erawh vana rah ang a ni thung. United chief executive Ed Woodward leh a nauten Sancho an lak theih loh avangin Ousmane Dembele an dawr a, a tawpah erawh chhawr nghal theih tur 'right winger' an la lut lo.

Ole Gunnar Solskjaer-a chhawr theih turah Sancho chhawpsak ni lo mah se Edison Cavani, Alex Telles, Facundo Pellistri leh Amad Diallo te an lalut. Kum 18 mi Diallo erawhin nakkum January-ah English club a zawm thung ang.

Sir Alex Ferguson-a awm laiin Manchester United-in an it zawng an hlah lo a, an elpui club-ten sum hman tam an hreh laiin United thuneituten Scottish manager duh zawng an laksak ṭhin. Transfer-a 'risk' an lak ngam avangin khelmualah result a ṭha a, khawvel club ropui ber zingah an awm theih phah.

Tun hnaiah erawh Man United-in player ṭha a hip na tawh lo a, transfer hnuhnung pathum thlir kir pawhin transfer tawp niah an talbuai ṭhin hle. Kumin January transfer khan Odion Ighalo leh Bruno Fernandes te chu transfer tawp niah an la hram a, Nigerian striker Ighalo hi an duh ber ni pawhin a lang lo.

Nikum nipui thlir let pawhin Mario Mandzukic leh Paulo Dybala te nen hun rei tak sawi zawm an ni a, an la thei lo ve ve. Kuminah pawh a danglam lo, Jadon Sancho lakluh chu Solskjaer-a duh ber a nih laiin an la thei lo a, United ṭantute tan nipui transfer hi khelmuala an result chhia vanga an thinurna belhchhahtu chauh a ni.

Manchester United leh Jadon Sancho hi an inhnaih hman viau anga ngaih a ni a, English winger hi United jersey number 7 ha tura sawi a ni hman. Sancho leh United hi an inhnaih viauah ngaih theih ni mah se a tak takah chuan an inhnaih lo.

Borussia Dortmund-in Sancho hralh an phal a, a manah euro maktaduai 120 an chhiar a, hun bi tiam atan August 10 an ruat. Bundesliga club hian thuchhuah an siam hian an ti tak taka, Man United lamin an ngaih thu taksak tawk lo.

United an ngawi a, August 10-ah Dortmund sporting director Michael Zorc chuan hun tiam a ral thu leh Sancho a cham tur thu a puang. Hetah chiah hian United director pakhat hlauthawng chuan thuchhuah chu a dik em tih a zawtfiah a, Dortmund lam chuan, "Eng nge in beisei? Engkim kan sawi chiang a ni lawm ni?" tiin lungawi lo takin an chhang.

Dortmund chief executive Hans-Joachim Watzke pawhin nipui transfer a inhawnin United hi a biak thu a sawi a, an duh dan zawng zawng chiang takin a hrilhfiah. United lam hi hun tiam pelh hnuah pawh Sancho agent Emeka Obasi leh hemi transfer-a puitu agent Marco Lichtsteiner hmangin an la inbe reng a, English midfielder hi lak theih turah an la ngai.

Nipui transfer ṭantirha lak an tum tawh kha September kar tawpah chief negotiator Matt Judge hmangin an dawr a, pound maktaduai 80 (€88m) leh a chet ṭhat dan a zira pek belh an inhuam thu Dortmund an hrilh. German club-in an hnawl nghal a, Dortmund-in Sancho mana an chhiar zat (€120m) hi a tlawm mah mahah an ngai zawk.

United lamin an sum dinhmun an thlir a, Sancho hlawh leh agent fee zawng zawng nen an sum sen tur euro maktaduai 250 a nih theih avangin sum an theh chhuak phal lo. England sorkarin inkhel en hun an tih tlai avangin pound maktaduai 50 an la chat belh theih bawk avangin Dortmund phut zat an pe ngam lo.

Manchester United hian kum 2017-a Sancho-a'n Dortmund a zawm khan English midfielder hi an enthla daih tawh a, inbiakna awm tak tak erawh United-in kumin July thlaa Champions League an khel dawn tih an nemngheh khan a ni.

United hian Sancho hlawh tur an sawipui hmasak ber hian Dortmund-a a hlawh zat aia tlemin an indawr a, English club hian Alexis Sanchez-a an tihsual tawh avangin player hlawhah an fimkhur hle. Bruno Fernandes-a'n kar khatah £150,000 a hlawh a, player thar Donny Van de Beek pawhin kar khatah £110,000 chauh a hlawh. 

August thlaah United-in Sancho an dawr nawn a, hetah hian chet ṭhat dan a zira hlawh pun theih dan a awm a, an la inbe fel thei chuang lo. Sancho aiawh te hian David de Gea hlawh kar khata £375,000 beisei pha lo mah se Paul Pogba hlawh kar khata £250,000 vel an phut.

September kar hnihnaah United leh Sancho ten hlawh chungchangah inremna an nei a, agent hlawhah pawh an innawr hniam thei bawk. Amaherawhchu player manah erawh United-in Dortmund beisei zat an pha lo hrim hrim. Sancho pawh hian Dortmund phutna ang zata United-in an ngam lo a nih chuan chhuah châkna a nei chuang lo a, English club hian a man phu tawk aiin an dah hniamah a ngai.

Chutihrualin Sancho hi United forward Marcus Rashford nen an inkawmngeih a, Manchester City-ah a awm tawh avangin Manchester-ah ṭhian ṭha a ngah. Hengte avang hian English winger hian Old Trafford-a kal chu a duh ngei a, amaherawhchu United-in chuhpuitu an nei lo chungin sum an theh chhuak phal lo. 

Transfer hun inhawn hunah Manchester United hian Sancho hi an dawr leh a rinawm a, amaherawhchu chumi hunah chuan English club hian chuhpuitu an neih tawh turah a ngaih theih a, Dortmund lamin a contract an pawhsei sak avangin a man pawh an tihsan a rinawm bawk.

Real Madrid aṭangin loan hmangin Gareth Bale a lak theih a, Welsh international hian Old Trafford-a kal hi hreh lo mah se Sancho lak theih loh chauha lak tur a nih avangin a pawm lo a, Tottenham Hotspur lamah a lung a la leng tel bawk.

Watford winger Ismaila Sarr hming a ri a, United-in loan hmanga lak an duh avangin Watford-in an remti lo. Sarr bik erawh Championship club Watford tana khel a nih avangin United-in October 16 thleng hun an la nei. July thlaah Dembele chungchang ngaihvenin Barcelona an be tawh a, hetihlai hian Liverpool pawhin an ngaihven avangin French forward hian Old Trafford lama kal hi a duh lo. 

Liverpool-in Diogo Jota an la a, United tan Dembele lalut turin beiseina thar awm mah se French forward hian Barcelona a cham a duh. Catalan club lamin hralh an duh a, United-in loan a lak an duh a, a tawpah erawh inbiakna a tlawlh. 

United hi player hrang hrang Real Madrid forward Luka Jovic, Inter Milan winger Ivan Perisic leh Juventus winger Douglas Costa te nen pawh sawi zawm an ni a, a hlawhtling lo vek. Hei chauh hi a ni lo, Chelsea player ni ta Kai Havertz lak tumin January khan Bayer Leverkusen an dawr a, a man an phut zat an ngam loh avangin an inhnukdawk bawk.

Edinson Cavani : Paris St-Germain striker hlui Edinson Cavani hian club football-ah match 556 khelin goal 341 a khung a, French club lian tan hian match 301-ah goal 200 khungin record chelhtu a ni. Kum 33 mi Cavani hian Uruguay tan pawh match 116 khelin goal 50 a khung a, a statistics hian a ṭhatzia a nemnghet.

Amaherawhchu season hnuhnung pahnih thlir kir chuan hliam vangin Cavani hian a nih tur ang a ni pha lo a, PSG-in a contract an pawhsei loh chhan hi Neymar nen inhmuh thiam loh vang ni bawk mah se a ṭhat tawk loh vang a tih theih tawh bawk. 

Uruguayan striker hi Palermo, Napoli leh PSG-ah season tinin match 30 chhuang khel ziah ang ni mah se season hnuhnung pahnihah chuan vawi 21 leh 14 chiah a khel.

United-ah hian hming langsar Radamel Falcao, Alexis Sanchez, Angel di Maria leh Bastian Schweinsteiger te an hlawhchham tawh a, Cavani hi an lakluh tum ber a nih loh bawk avangin Uuruguayan striker chungah rinhlelhna lian tak a awm. Chutihrualin Zlatan Ibrahimovic pawhin upat lama hlawhtling taka a khelhna hmun Old Trafford-ah Cavani hian hming chher turin theihna a nei a, United-in number 9 'dik tak' an neih loh bawk avangin an mamawh tak tia sawi theih a ni.

Cavani chuan, "Ka football chanchin ziahna bu hi ziah chhunzawm ka duh a, ka tih tur chu rim taka hnathawh a ni. Manchester United hi an ṭantu rinawm tak tak avangin ka khel châk a, manager nen kan inbiak hnuah he club jersey mawi tak hak châkna hi ka neih belh bawk," tiin a sawi.

Alex Telles : Manchester United-in Porto aṭangin euro maktaduai 15 (£13.6m) in an lei a, a chet ṭhat dan a zirin euro maktaduai hnih (£1.8m) an pek belh ang. Kum 27 mi Telles hian kum li daih contract a ziak a, kum khat dang pawhsei theih dan a awm. Brazilian left back hian kum 2016 khan Galatasaray aṭangin Porto hi a zawm a, Portuguese club tan hian goal 26 khungin assist vawi 50 a nei a, left back ni chung siin a goal nawr a na hle.

Telles chuan, "Porto nen nomawi tam tak ka chawi a, United-ah chhunzawm ka duh. Manager-in tum dan fel tak a nei sa a, United kawr ropui tak hi hak hlan ka nghakhlel tawh," tiin a sawi. United hian left back Luke Shaw leh Brandon Williams te an nei sa a, heti chunga Telles an la lakluh tho avangin Norwegian manager hian defence pathum hman a rilrukah a ngaih theih a, Shaw hi vei lama awm centre back-ah a chhawr theih bawk.

Amad Diallo : Atalanta winger Amad Diallo-a'n nakkum January thlaah United a zawm dawn a, English club hian Ivorian winger manah hian euro maktaduai 21 (£19m) an pe ang a, a chet ṭhat dan a zirin euro maktaduai 20 (£18.2m) an pek belh ang. United leh Atalanta te hian player manah inremna nei tawh mah se Diallo hian medical, personal terms leh work permit te a la tifel lo.

Kum 18 mi Diallo hi October 2019 khan Atalanta tan a inlan a, goal a khung nghal. Bench aṭangin Serie A match vawi thum a khel tawh a, tun season-ah Gian Piero Gasperini-a'n a la chhawr lo. United hian tun hmain manto takin kum 18 mi Cristiano Ronaldo an lalut tawh a, Portuguese forward erawhin tawnhriat a ngah tawh thung a, first team-ah a khel tlak nghal. Diallo erawh tun dinhmuna United siam ṭhatu ni loin hun rei zawk thlir chunga lakluh niin a lang.

Facundo Pellistri : United-in pound maktaduai 9-in winger Facundo Pellistri chu Uruguayan club Penarol aṭangin an lalut a, kum nga daih contract a ziak. Pellistri hi Uruguayan Primera Division-ah vawi 37 zet a inlan tawh a, amaherawhchu Diallo ang thoin Ole Gunnar Solskjaer pawhin English football a khel tlak turin hun a duh tur thu a sawi.