NEOG Football Semifinal : Mizoram khingpui tur Arunachal Pradesh

3rd NorthEast Olympic Games-ah Mizoramin semifinal-ah Arunachal Pradesh an hmachhawn dawn a, vawiin chawhnu dar 2:00 hian NAPTC, Chumoukedima, Nagaland-ah final khel tur an zawng ang. Chawhma dar 11:00-ah Nagaland leh Manipur ten semifinal hnuhnung zawk an khel ang.

Nimin khan group match hnuhnung ber khelh a ni a, group B-ah Assam leh Manipur ten Mizoram hnungzui tur an zawng. Assam tan draw tawk mah se Manipur lakah an goal an venghim zo lo. Goal awmchhun hi first half injury time-ah Sadananda-a'n a khung a, Manipur 1-0 in an chak.

Manipur hian group A pakhatna Nagaland an hmachhawn dawn. Nagaland hian Tripura leh Arunachal Pradesh te an hneh hnuin group match hnuhnung berah Meghalaya nen 2-2 in an inhnehtawk.

Mizoram awmna group B-ah team pathum chiah an awm a, Lalbiaksanga Colney hote hian Assam leh Manipur an hneh ve ve. Mizoram Police behchhana team din Mizoram hian Manipur 4-0 ngawta an sawp avangin gold medal la tura rinkai an ni.

Chutihrualin Mizoram khingpui tur Arunachal Pradesh hi team tum châkawm an ni lo a, Nagaland ai maha ṭha zawk tura ngaih an ni. Arunachal hian nimin khan Tripura 4-1 in an sawp a, inkhelh thiam state tih tur ni lo mah se kuminah Santosh Trophy an thlen avangin inpuahchahna an nei rei tawh.

Santosh Trophy-ah Arunachal Pradesh hian chak an nei lo a, group stage pawh an paltlang lo. Amaherawhchu Arunachal hian game ṭha tak an khel a, BS-a leh a hote pawh an fimkhur a ṭul ang.