Tennis-ah Mizoramin semifinal an lut

Mizoram mipa tennis team chuan North East Olympic Games khelh laiah semifinal an lut a, vawiinah Nagaland nen an inhmachhawn leh ang.

Nimin khan ruah a sur avangin ruahman dan pangngaia khelh theih a ni lo, inchhung (indoor) ah khelh niin, set khat la turin game liah tih hniam a ni bawk.

Mizoram hian Arunachal Pradesh chu 3-0 in an hneh. Singles match-ah Calvin Lalremsiama leh JH Lalhruaizela ten set hloh loin an khingpui ve ve an hneh a, anni pahnih bawk hi doubles-ah ṭangdunin an chak leh bawk a ni.

Team inelna bakah hian mimal inelna lam Men's Singles (Basil L Khuma) leh Men's Doubles (Basil L Khuma & Lalrinpuia) ahte khelh hmabak a la awm bawk.