IPL17 kan nghak chhuak ta

Cricket inelnaa sum tamna ber Indian Premier League Season 17 chu zanin dar 8:00 aṭangin khelh ṭan a ni dawn a, champion lai Chennai Super Kings-in M. A. Chidambaram Stadium, Chepauk-ah Royal Challengers Bangalore an mikhual ang. Mahendra Singh Dhoni captain-na hnuaia khel CSK hi vawi nga champion tawh an ni a, Virat Kohli telna RCB hian vawi khatmah nomawi an la chawi lo.

Team 10 bawk

Season liam taa team 10 Chennai Super Kings, Delhi Capitals, Gujarat Titans, Kolkata Knight Riders, Lucknow Super Giants, Mumbai Indians, Punjab Kings, Rajasthan Royals, Royal Challengers Bengaluru leh Sunrisers Hyderabad te bawk kha, kuminah pawh an inel dawn.

Player siksawi erawh a awm thung. CSK-in coach atan champion puitu Stephen Fleming an la hmang chhunzawm a, Bangalore erawhin Sanjay Bangar aiah Andy Flower an la lut. MS Dhoni-a'n CSK a la ho thei dawn a, RCB captain hi South African star Faf du Plessis a ni.

Super Kings player chhuahtir zingah Ben Stokes, Ambati Rayudu leh Kylie Jamieson te chu a langsar an ni a, chutihrualin Dhoni bakah Ravindra Jadeja, Deepak Chahar, Moeen Ali, Ruturaj Gaikwad, Mitchell Santner leh Devon Conway te an chelh. New Zealand batter Conway hi hliam vangin a inlan thei dawn lo thung.

Royal Challengers lamin Wanindu Hasaranga, Harshal Patel, Josh Hazlewood, David Wiley leh Kedar Jadhav te an chhuahtir a ni a, heng player-te hi nuai 100 hlawh pha chin vek an ni. RCB hian Du Plessis leh Kohli bakah Cameron Green, Glenn Maxwell, Mohammed Siraj, Dinesh Karthik te an chelh a, tun season-ah an hun a inherchhuah ve ngei an beisei ang.

A chhehvel

India ram chhunga T20 hmanga inelna 2023–24 Syed Mushtaq Ali Trophy-ah bowler-in over khatah bouncer vawi hnih an vawm thei a, hei hi a hlawhtlinga ngaih a nih avangin MPL17-ah hman a ni dawn. IPL match hi Star Sports-ah pekchhuah a ni dawn a, JioCinema kaltlangin a en theih a ni ang.

IPL hi TATA Group chuan 2024-28 chhung an sponsor dawn a, kum nga chhunga an sponsor man hi Rs 2,500 crore a ni a, a tam hem hem hle. TATA Group hian 2022 leh 2023 khan a sponsor tawh bawk a, tun ṭuma a sponsor-na hi IPL history-ah a tam ber.

Cricket ngainatute tan chuan zan tinin IPL inkhel en tur a awm chho leh dawn a, final hi May 26, 2024-ah khelh tur a ni ang.