Athletics-in medal hawn lo

3rd NorthEast Olympic Games-ah Mizoramin Athletics-ah infiammi 11 leh coach pakhat a tir a, medal hawn lo mah se hmasawnna hmuh tur a awm. Mipa leh hmeichhe team-te 4x100m relay-ah palina an ni ve ve a, Mizoram aiawha kalte Aizawl aiin inelna neihna hmun Nagaland-ah an record a ṭha zawk bawk.

Amaherawhchu Athletics-ah Mizoram a la hnufual deuh avangin medal lak hi a la harsa rih. Chutihrualin Mizoramin NE Olympic Games emaw National Games emawa che ṭha tur chuan athletics-ah hmasawn a ṭul hle.

NEOG 2024-ah hian athletics-ah ringawt gold medal lak theihna 28 a awm a, Mizoramin chan pakhatmah a neih ve loh avangin inelna pumpuia a sang pathum zinga tel phak beisei ngam chi a ni lo ang.

Mizoram coach Vanlalawmpuia Fanai chuan, "Athletics-ah hian Mizoram kan ṭhanharh a ṭul hle. School leh college level-ah kan ṭan a ngai a, Mizoram pum huap anga inelna siam tam kan mamawh. Chumi tur chuan sorkarin Athletics hi a ngaihven a ṭul a ni," tiin Vanglaini a hrilh.