Second round-ah Sindhu, Srikanth leh Lakshya

Swiss Open Super 300 badminton tournament khelh laiah - Indian player ṭha PV Sindhu, Lakshya Sen leh Kidambi Srikanth ten an khingpui ṭheuh hnehin second round an lut.

Sindhu hian kum 2022 khan he hmunah hian nomawi a lo chawi tawh, tun ṭumah pawh hian a mikhual lo hle. Olympic medal vawi hnih la tawh hian Pornpicha Choeikeewong chu 21-12, 21-13 in a hneh, a match lehpekah chuan Tomoka Miyazaki a hmachhawn leh dawn a ni.

Mipa singles lamah Sen-a chuan darkar khat leh minute hnih chhungin Leong Jun Hao chu 21-19, 15-21, 21-11 in a hneh. India tlangval hi French Open leh All England Championship lama semifinal thleng zawn thei a ni a, tun ṭumah pawh hian beisei a nei sang leh hle.

World number 1 hlui Srikanth pawh a talbuai lo - minute 43 chhungin world number 24 Wang Tzu Wei chu 21-17, 21-18 in a hneh a, kum 2015-a a lo champion tawhna hmunah hian nomawi chawi leh turin beiseina a nei sang.