Miami Open-ah Murray a chak

Tennis inelna ngaihhlut zinga mi Miami Open khelh mek a ni a, mipa world number 1 hlui Andy Murray chuan a match hmasa berah Matteo Berrettini chu 4-6, 6-3, 6-4 in a hneh.

Berrettini tan Miami Open hi kumina a tournament khelh hmasak ber a ni a, set hnihna an khelh lai hian a lu na vangin enkawl lailawk a ngai, a hriselna dinhmun en dik a nih hnuah a khel chhunzawm leh a ni.

Darkar hnih leh minute 49 an inkhelh hnuah Murray a dingchang ta zawk. Britain tlangval hian Australian Open 2024 hnua hnehna a chan lehna hmasa a ni, a chak hnuhnung zawk hian 6-3, 6-3, 4-6, 6-7(7), 7-6 (10-6) in a chak, hun a mamawh rei thei hle.

Grand Slam vawi thum champion tawh Murray chuan, "A tir lamah duhthusama ṭhain khel lo mah ila, a hnu lama ka thawh chhuah leh dan chu a lawmawm takzet," tiin a khelh dana a lungawi thu a sawi.

Tun hmain Murray hian Miami Open nomawi hi vawi hnih a lo chawi tawh, he tournament bikah hian vawi 30 a chak tling ta a, tuna la inkhel mek player zingah Novak Djokovic leh Rafael Nadal te hnungzuiin hetiang zat chak thei a ni ta bawk.

Kum 36 mi Murray hian a match lehpekah chuan Tomas Etcheverry a hmachhawn leh ang. Seeded 29-na Etcheverry tan a match hmasa ber a ni dawn a, tawnhriat nei Murray lakah inkhel awlsam beisei chi a ni lo ang.