Mizoram tawpna quarterfinal

Hockey India Senior Women National Championship khelh laiah Mizoram chu quarterfinal-ah an zinkawng a tawp. Hockey Mizoram team hian inkhel inhnehtawk takah Jharkhand chu 2-1 in an hneh lo.

Nilaini zan Major Dhyanchand Hockey Stadium Pimpri, Pune-a inkhelah Jharkhand tan Deepika Soreng leh India forward Sangita Kumari ten goal an khung a, goal hnih an phurh hnuah Mizoram tan Lalremsiami Hmar chuan goal khat a sut.

Mizoram hian nawr zuiin goal khung theihna remchang pawh an insiam thei, mahse an vanduai ṭum niin goal an khung thei lo. India senior team player pali ngawt neitu Jharkhand chu a tlang zawkah an ṭang.

Semifinal lut phak lo mah se Mizoram tan tournament ṭha tak a ni. Pool match paltlanga quarterfinal an thlen avang khan National Games khel turin an tling a, ram pum huap infiamna khawmpui lianah an tel dawn.

Mizoram player bakah coach leh assistant coach te hi Thenzawl SAI Hockey Training Center aṭanga inzir chhuak vek an ni. India ram hmun hrang hrangah awm darh tawh mah se inelna hmachhawn tur hian hun tepter tawh takah koh khawm an ni.