Match hmasaah Osaka a chak

Hmeichhe tennis world number 1 hlui Naomi Osaka chuan Miami Open a match hmasa berah hnehna a chang. Japanese nula hian a khingpui Elisabetta Cocciaretto chu 6-3, 6-4 in a hneh.

Kum 26 mi Osaka hian Miami Open a khelh hnuhnung chu 2022 kha a ni a, nomawi inchuhna inkhelah Iga Swiatek hneh loin pahnihna dinhmun a luah, tun ṭumah hian fa a neih hnua inkhel leh a nih avangin beisei erawh a nei sang lutuk rih lo.

Grand Slam vawi li champion tawh Osaka hian seeded 15-na Elina Svitolina a hmachhawn leh thei dawn a, tun hnaiah result a neih ṭhat tawk loh avangin a tir aṭangin fimkhur taka a khelh a ngai ang.

Hmeichhe singles inkhel dangah Sloane Stephens chuan a kum 31 tlin champha lawm nan Angelique Kerber chu 6-2, 6-3 in a hneh. Donna Vekic pawhin Karolina Pliskova chu 6-4, 2-6, 6-2 in a hneh a; American player pahnih Danielle Collins leh Shelby Rogers te pawh an tlang bawk.