Carlos Sainz intlansiak thei dawn

Formula 1 team hlun Ferrari driver Carlos Sainz chu tun kar tawpa Australian Grand Prix an tlan hunah a inlan thei dawn, a rilphir na an zai vangin hun eng emaw ti chhung chu a lo chawl lailawk tawh a ni.

Spanish driver hi tun thlatir lama tlan Saudi Arabian GP-ah khan a inlan thei lo, a hmun ruakah kum 18 mi Oliver Bearman a inlan a, ani hian F1 a hmachhawn hmasa berah pasarihna dinhmun lai a luah phak.

Ferrari chuan thuchhuah siamin, "Carlos Sainz chu infiamna huangah a kir leh thei dawn ta," an ti. Ferrari team principal Fred Vasseur chuan an driver lakah beisei an neih san nghal thu a sawi bawk a ni.

Car intlansiakna sang bera intlansiak hmasaah khan Red Bull driver pahnihte chu a hmasa ber leh a dawtah an thleng a, anni pahnih hnungah hian Ferrari driver pakhat zawk Charles Leclerc a thleng.

Pathianni chawhma dar 9:30 hian Melbourne Grand Prix Circuit-ah Australian Grand Prix an tlan leh dawn a ni.