Nipui transfer a tawp Premier League sum sen tlem mah se league dangin phak lo

"Mipain thu lengvak an sawi tam lai ber chu football transfer bazar lai a ni," tiin an sawi ṭhin a, thil chiang leh chiang lo karah transfer ngaihnawm tak tak hriat tur a awm ṭhin. 

Thawhṭanni zan khan European football transfer chu a tawp ta a, season dang zawng aiin sum sen a tlem a, Premier League pawhin season dang aia sum an seng tlem chungin league dang aia sum hmang hnem ber chu an ni leh tho. 

London a hmunpui nei, inves-tment company Carteret Analytics-in an tarlan danin Premier League club-te hian nipui transfer-ah pound tluklehdingawn 1.21 an seng a, season hmasa nipui laia an sum sen aia a hniamna chu pound maktaduai 158 a ni. 

Premier League club-te hian season hmasa nipui transfer lai khan pound tluklehdingawn 1.376 an seng a, transfer tawp nia player manto ber chu Thomas Partey a ni - Atletico Madrid midfielder hian pound maktaduai 45.3-in Arsenal a zawm. 

Season dangah chuan August-ah transfer bazar khar a ni ṭhin a, season hmasa ṭan dawn khan Premier League ṭan hmain transfer tihtawp a ni - kuminah August 31 thlenga transfer theih turin club-ten vote an thlak leh a, season ṭan hnuah an bazar thei dawn tihna a ni. 

Mahse, Covid-19 vangin mumal takin infiamna khawvel kalpui theih a ni lo a, kum dang aiin season pawh an khar har - hei vang hian transfer pawh October thleng hawn a nih pha.

Covid-19 in a nghawng lian tak pakhat chu club-te sum lakluh a ni a, season dang aia kumina sum sen a tlem pawh hi thilmak tia sawi tur a ni hran lo.  Carteret Analytics chuan, "Kum nga liam ta chawhrual nena khaikhinin European top five league-ah nipui transfer a sum sen a tlem zawk vek.

"Premier League club-te sum sen tlakhniamna hi -7% a ni a, La Liga lamah chuan -46% a tling hial. Covid-19 hian transfer bazar-ah nghawng lian tak a nei tih a lang a ni," a ti. 

Premier League transfer tawp niah player 12 lakluh an ni a, kum 2014 hnua transfer tawp nia player lakluh an tlem ber ṭum a ni - season duhawm tak hmang mektu Everton-in pound maktaduai 25 a  Norwich defender Ben Godfrey an lakluh chu Partey tih loha transfer tawp nia player manto ber a ni. 

Manchester United-in an duh em em Jadon Sancho lalut thei lo mah se Porto left-back Alex Telles (£13.6m) leh striker Edinson Cavani (free) te an lalut a, rawlthar player pahnih Amad Diallo leh Facundo Pellistri ( £28m - player pahnih man) te an lalut bawk. 

Leeds United-in Rennes winger Raphinha (£17m)  an lalut a, Everton-in Roma goalkeeper Robin Olsen chu loan a lalutin winger Theo Walcott chu Southampton lamah loan vekin an chhuahtir.

Fulham-in Manchester City defender Tosin Adarabioyo chu kum thum chhung atan an lalut a, Chelsea winger Ruben Loftus-Cheek leh Lyon defender Joachim Andersen-te chuan Cottagers (Fulham sawina) hi loan-in an pan bawk. 

Tun nipui transfer-ah club parukin an club transfer record siamin player an lalut a, Man-chester City-in pound mak-taduai 65 a Benfica defender Ruben Dias an lakluh leh Chelsea-in pound maktaduai 71 senga Bayer Leverkusen midfielder Kai Havertz an lakluh chu tun nipui transfer a English top flight club-in pound maktaduai 50 chuang senga player an lakluh an ni. 

Season hmasa nipui transfer-ah kha chuan Premier League club 11 ngawtin an club record siamin player an lalut a, Sheffield United phei chuan vawi li ngawt an record hi an siam - pound maktaduai 50 chuanga lakluh player paruk an awm bawk. 

Havertz, Timo Werner, Ben Chilwell, Hakim Ziyech leh Edouard Mendy laluttu Chelsea (£222m) chu Premier League a club sum seng hnem ber an ni a, Manchester City (£141m) leh Barcelona (£112m) chu European club lian dang zinga pound maktaduai 100 chuang seng ve an ni. 

Premier League club-ten player an hralhna avanga sum an lakluh paih hnua player lei nana an sen zat chu pound maktaduai 820.2 a la tling a, kum nga liam ta chawhrual nena khaikhinin kumin hi player hralhna man paih hnua player lakluh nana sum an sen tam ber ṭum a ni - hetihlai hian La Liga (£58.6m) leh Bundesliga (£8.9m) chu transfer a an sum sen aiin an lakluh a tam zawk. 

Thawhṭanni zanah European top five league transfer a tawp fel ta a, chutihrual chuan Premier League club-te hi an la bazar chhunzawm zel thei dawn - hei erawh England chhungah chauh a ni. 

Chutihrualin transfer lian tham thleng tura beisei chi a ni tawh lo a, Premier League club-ten player an la lakluh theihte hi English Football League (Premier League hnuai lam zawng) player-te chauh a ni. 

English football tualchhung transfer hi October 16 zan dar 9:30-ah a tawp dawn a, Premier League club tenau zual tan chuan la chhawr ṭangkai theih tak tur niin a lang. 

European football khel tur tan erawh transfer pangngai tawp hnua player lakluhte hi Europe a inziahluhpui hman an ni tawh kher lo ang a, sum sen loh a finthlak tawh zawk mai thei.