Foxes tikhawtlai theitu Hammers

Leicester City-in an cham-pion hun an nghak a ni ber tawh a, Foxes hian match nga chiah khelh tur la awmah point sarihin anmahni hnaih bertu Tottenham Hotspurs lakah an fal. Amaherawhchu football-ah thilmak a thleng fo a, season tawp dan tur sawi lawk theih a ni lo.

Referee thlak

Thawhṭanni zanah Stoke City leh Tottenham inkhelh huna referee tur chu Kevin Friend a ni a, amaherawhchu Friend hi Leicester fan a nih avangin Neil Swarbrick chuan Britannia Stadium-a inkhel a kaihhruai ang.

The Professional Game Match Officials Ltd chuan, "Tun-ah hian pressure a sang tawh a, pressure sang zawk awm belhtir hi kan duh lo," tiin thutlukna an siam chhan an sawi.

Engtin zel?

Leicester hi referee-ah an innghat lo a, manager Claudio Ranieri-a'n a player-te a ring ngam. Italian manager chuan, "Kan player-te hi ka ringtawk a, khelmuala theihtawp an chhuah chhung chuan kar khata ni hnih chawlh pek ka tiam," tiin player nena an inkara inrintawnna a awm thu a sawi.

Kum 64-a upa Ranieri chuan, "Helai hmunah hian ka hlim a, club dang zawm ka ngaihtuah lo. Kum ruk emaw kum sarih emaw contract min pek ka beisei a, helai hmuna hun tawp hman ka duh a ni," tiin Leicester nuam a tih thu a sawi.

Foxes hi season tir khan pawisa thapna lamah chuan champion rinkai an ni lo a, betting odd pawh 5,000/1 niin Leicester champion tura Re 1 dah tan Rs 5000 a dawn theih tihna a ni. Tunah erawh season tawp lam a hnai tawh a, Ranieri hote hi champion tura rinkai ber an ni tawh.

Leicester kawng dal theitu West Ham hi league-a Arsenal champion beiseina titawptuah ngaih theih an ni a, amaherawhhcu FA Cup lamah Manchester United an dal zawh loh avangin Foxes tan zamna tur erawh a ni lo.

UCL khelh tum

FA Cup aṭanga tla zo hlim West Ham tan league-a chet ṭhat chauhin season thara European competition khelh theihna kawng a inhawng tawh. Hammers hmalam chu Foxes nena an result-in a hril ang.

Manchester United-in Champions League khelh an tum a, Aston Villa an khelh hunah captain Wayne Rooney-a'n inkhelh bul a ṭan a rinawm. German midfielder Bastian Schweinsteiger erawh season tluanin a inlan thei tawh lo ang.

Manchester City-in an hmelma United laka fal turin Stamford Bridge-ah Chelsea an hneh a ngai a, Blues hi che
ṭha lo mah se point thum hmuh awlsamna hmun a ni lo. Season thara Pep Guardiola enkawl tur City hian Premier League-ah palina ni phak lo mah se Champions League-a an champion chuan Europe-a inelna sang ber an khel leh thei ang.

Manuel Pellegrini hote hi Champions League-a an champion a nih chuan pangana awm mek United pawhin season tharah UCL an khel thei ang. Chutihrualin Liverpool-in Europa League nomawi hmanga UCL khelhna ticket an nei a nih chuan Louis Van Gaal hote hi palinaah pawh ni se Champions League an inlan lo ang.

Europe-a club football inelna sang berah hian ram pakhatin club panga bak an thawh thei lo tih dan a awm a, City leh Reds hian champion vanga UCL an khel a nih chuan league lama pathumna thleng tan chauh hmunruak a awm dawn a ni.