Barca leh Messi an ral mek?

Luis Enrique enkawl Barcelona hi khawvela team hlauhawm berte zinga mi an ni a, mahse tun hnaiah Catalan club hian beisei ang result an nei thei lo thung.

La Liga-ah Barcelona hian Real Ma-drid an hneh loh hnuah Real Sociedad hneh leh tawh mah se league table-a pahnihna Atletico Madrid aiin point thum chiahin an sang tawh a, pathumna Real pawhin point li chiahin an thlau tawh a ni.

Champions League quarterfinal-ah champion lai Barca hi Atletico-in an pet chhuak thei a, season hmasa treble champion thei team hi tun hnaiah hneh theih an ni tih a lang nawn ta fo. An thiampuipa Lionel Messi chuan Champions League last 16-a Arsenal laka goal a khung hnuah goal a la khung leh lo!

Messi hian goal 500-na khung turin goal khat chiah ma-mawh tawh mah se a mamawh ber a nei thei mai bik lo a, Pathianni zar dar 12:00-a Valencia an mikhual tur hi Enrique naute tan fiahna a ni ang.

Hetihlai hian Barca elpui Atletico Madrid leh Real Madrid te erawhin boruak
ṭha tak an nei chho mek a, Champions League semifinal an lut ve ve. Match 251 a kaihhruai tawh aṭanga vawi 158 hnehna chanpui thei Diego Simeone naute hian Pathianni zan dar 9:45 hian Granada an lo mikhual ang.

Player a nih lai pawha Real Madrid innghahna lo ni tawh ṭhin, coach a nih hnu pawha an thlamuanpui Zinedine Zidane a kaihhruai club hi zanin dar 7:30 hian Getafe khel turin an zin chhuak thung dawn a ni.