Inter beisei tawp zan?

Inter Milan tan season thara Champions League khel tur chuan league match khelh hmabak pa-ruk an neihah an chetsual a thiang tawh lo. Zanin dar 12:15 hian San Siro-ah Serie A champion tum Napoli an lo mikhual dawn a, Roberto Mancini naute tan beisei tawp zan a nih theih rualin chak lo tur chiangsa a dah nghal ngawt theih an ni bik lo ang.

Nerazzurri hian point 58 hmuin pathumna AS Roma chu point rukin an phak lo mek a, zanin an mikhual tur hi tun hnai an intawn hnuhnung vawi ruka an hneh theih miah loh an nih avangin an hna a hautak dawn hle.

Season tir lam khan team pahnih hi league-ah an lo inhmachhawn tawh a, Napoli tan striker Gonzalo Higuain chuan second 64-naah goal a khung a, Inter-in Serie A-a goal an chhuah ran ber ṭum a ni. Mahse, Higuain hi hrem vangin zanin hian a hmel kan hmu thei dawn lo.

Italian manager Mancini chuan, "Match ruk khelh tur kan la nei a, kan theihna zawng zawngin kan beih a ṭul tawh. Tu pawhin dinhmun ṭha lo taka awm lai kan nei vek a, huaisen taka kan hmachhawn a nih chuan hlawhtlinna a lo thleng ve mai ṭhin," tiin Napoli lakah point hmuh a inbeisei hle.