Europa League Champion lai Sevilla-in semifinal an lut

Sevilla-in season thum chhung a zawna Europa League nomawi chawi an tumna an chhawm nung zel a, Athletic Bilbao chu penalty-a hnehin semifinal an lut.

Ningani zan Europa League quarterfinal inkhel dangah Villarreal leh Shakhtar Donetsk-te'n an khingpui ve ve hnehin semifinal an lut bawk.

Sevilla an vannei

Sevilla in khualmuala 2-1 a an hneh tawh hnu Spanish club tho Athletic Bilbao an mikhual a, 2-1 in mikhual team hi chak mah se inkhel pahnih belhkhawmah team pahnih hi 3-3 in an inhnehtawk.

Bilbao tan Aritz Aduriz leh Raul Garcia-ten goal khat ve ve an khung a, Sevilla-in Kevin Gameiro hmangin goal khat an khung ve bawk.

Extra time-ah pawh goal dang a luh loh avangin penalty hmangin chak zawk zawn a ni a, Sevilla hi 5-4 in a chungnung zawkah an ṭang ta a ni. Bilbao tan chak loh result piah lamah chanchin lawmawm loh a awm a, striker Aduriz chu hliam vanga lakchhuah a ni.

Villarreal an tlang

Spanish club Sevilla tlang zanah Villarreal-in tlang loh an duh bik lo a, Sparta Prague chu 4-2 a hnehin an club chanchina a vawi thum nan Europa League semifinal an lut.

Villarreal-in minute 50 chhung-in goal li an khung a, Cedric Bakambu chuan goal hnih a khung bakah Samuel Castillejo leh Bruno Soriano-ten goal khat ve ve an khung bawk.

Mualneitu team tan Borek Dockal leh Ladislav Krejci-ten goal khat ve ve khung mah se inkhel hmasa zawkah 2-1 a an lo tlawm tawh bawk avangin inkhel pahnih belhkhawmah 6-3 in a tlawm zawkah an ṭang ta a ni.

Shakhtar an ropui

Ukrainian club Shakhtar Donetsk-in Portuguese club Sporting Braga tan an ṭha lutuk hret tih an lantir a, an mikhual team hi 4-0 in an puanthuah an lo tel tir. Inkhel hmasa zawkah Shakhtar hi 2-1 a an lo chak tawh bawk avangin inkhel pahnih belhkhawmah 6-1 in an chungnung zawk.

Croatian full-back Dario Srna chuan Shakhtar Donetsk chanchina inlan hnem ber record siamin Ukrainian club tana a match 486-na a khel a, a record siam hi penalty goal-in a lawm bawk. Mualneitu team tan Srna bakah Viktor Kovalenko chuan goal khat a khung a, Braga defender Ricardo Ferreira chuan an lamah goal hnih ti lut palhin Portuguese club mualphona a belhchhah.