Manchester-ah Ronaldo a kir dawn

UEFA Champions League-ah club pali chiah an awm tawh a, nimin khan Nyon, Switzerland-ah semifinal intum tur pawh niin Manchester City hmachhawn tur chu Real Madrid a ni. Spa-nish manager Pep Guardiola-a'n season thara a club enkawl tur City a pumpelh a, Bayern Munich-in Barcelona pet chhuaktu Atletico Madrid an hmachhawn ang.

Kumin Champions League final hi May 28 hian San Siro Stadium, Milan-ah khelh a ni dawn a, Manuel Pellegrini leh Guardiola intawng tura duhtu an tam hle.

Pellegrini hian Real Madrid hi season khat chiah a enkawl tihin kum 2010 khan an ban a, Chilean coach hi phuba lakna remchang siam sak a ni.

City boss hian Real a enkawl kum hian Karim Benzema leh Xabi Alonso ten Spanish club lian hi a zawm a, Manchester United aṭangin pound maktaduai 80-in Cristiano Ronaldo an la lut bawk. Goal 16 khunga tun season Champions League top scorer ni mek Portugal captain hi Manchester-ah a kir dawn a, a letna tur erawh lawm a hlawh lohna zawk Etihad Stadium a ni ang.

Semifinal pakhat zawk hi 1974 European Cup Final rematch a ni dawn. Kum 42 kalta khan Bayern leh Atletico te hi 1-1 in an inhnehtawk a, ni hnih hnuah stadium ngai Heysel Stadium, Brussels-ah replay khelh niin Bayern-in 4-0 in hnehna an chang.

Tiki Taka ti lartu Barcelona hnehtu Diego Simeone hoten Guardiola hnuaia 'Tiki Taka thar' kheltu Bayern hneh an tum tur hi a hmuhnawm ang.

UCL Semifinal Fixtures

First Leg

26 April City vs Real

27 April Atletico vs Bayern

Second Leg

3 May Bayern vs Atletico

4 May Real vs City