Inlehthalna ropui lantirtu Reds an vul

Kum 2005 UEFA Champions League final-ah Liverpool-in AC Milan laka si thum an phurh zet hnuah Steven Gerrard-a hoin Italian club an lehthal a, football khawvel barakhaihin a vawi nga nan Europe-ah an champion.

Ningani zan khan Europa League quarterfinal second leg khel turin Liverpool-in Borussia Dortmund an mikhual a, minute 33 chauh a awm tawh tiha goal khung an mamawh zat chu goal thum a ni.

Reds-in captain fantastic kawl tawh lo mah se manager Jurgen Klopp-a'n nei a, si thum an phurh zet hnuah ropui takin Borussia Dortmund 4-3 in an lehthal a, Europa League semifinal an lut. Reds-in Hollywood movie vel chauha thleng thei nia kan ngaih kha a takin min hmuhtir a, football ropuizia khawvelin a hre nawn leh ta.

Anfield-in zan ropui tak tak a lo hmu tawh ṭhin a, inkhel ropui tak tak a lo thleng tawh ṭhin - Ningani zana inkhel hi Liverpool game ropui zingah chhiar tel a ni fo tawh ang.

Mikhual tlangnel

Signal Iduna Park-a inkhel hmasa zawkah Liverpool leh Dortmund 1-1 in an inhnehtawk a, Reds tan Europa League semifinal lut turin goal chhuah loh a tawk.

Mahse, Anfield-ah minute 10 a liam chauh tihin Reds-in goal hnih an chhuah tawh a, Dortmund tan Henrikh Mkhitaryan leh Pierre-Emerick Aubameyang-te'n goal an khung.

Divock Origi-a'n minute 48-naah Reds beiseina chhi nung turin goal khat khung mah se Dortmund-in Marco Reus hmangin goal an khung leh a, inkhel pahnih belhkhawma Dortmund hmahruaina chu 4-2 niin away goal rule hman a nih avangin Reds tan goal thum tal khung a ngai.

Istanbul hre reng rawh u!

Liverpool boss Jurgen Klopp-a'n chawlhlawk laiin Reds player-te chu kum 2005 Istanbul Champions League final-a Liverpool-in ropui taka AC Milan an lehthal chu hre reng tura a fuih thu inkhelh zawhah a sawi a, Reds player-te'n an pu thusawi an hre reng.

Philippe Coutinho leh Mama-dou Sakho-te'n Liverpool si phurh an rul zo a, chak tur chuan goal khat khung an la mamawh cheu. Injury time a ni tawh a, Reds fan-te thin phu a rang a, beiseina nei chungin beisei an nei ngam lo.

Thil mak a thleng a, ni e, football ropuina a takin a lang - Dejan Lovren chuan James Milner-a ball cross chu minute 91-naah tauh lutin Anfield-a nghing a, Reds fan an sapatal. Inkhel pahnih belhkhawmah Liverpool 5-4 in an chak a, Istanbul-a thil mak thleng kha Reds vekin an thlen nawntir.

'The Klopp Effect'

Liverpool boss Jurgen Klopp chuan, "Chawlhlawk lai khan chak turin goal thum kan mamawh a, ka player-te hnenah harsa dawn mah se kan tum phawt a ngai tih ka hrilh a ni," ti-in a player-te chu theihtawp chhuah tura a fuih thu a sawi.

Klopp chuan sawi chhun-zawmin, "Kan result hi a ropui thlawt a, a ṭha chungchuang a, thinlung a khawih a, engkim hi a tel a ni tawp mai. Inkhel danglam tak a nih avangin theinghilh chi a ni lo - hmalam panin kan kal zel ang a, he game ropui hi chhawm nun zel kan tum ang," a ti.

Sawi tur nei lo

Dortmund boss Thomas Tu-chel chuan, "Kan chak loh dan kha sawifiah tura min duh a nih chuan sawi theih ka nei lo. Kan chak loh dan hi fiah taka sawi theih a ni lo a, rilru lama a fiah ang hian sawi chhuah theih a ni lo," tiin an chak loh dan chu mak a tih thu a sawi.

Tuchel chuan sawi chhun-zawmin, "Kan inkhel boruak kha thlirlet chuan engkim kha thleng tura ruat lawk ang mai niin ka hria a, thawnthu a tawp dan kan hriat sa ang mai a ni. Champions League final-a AC Milan an lo hneh tawhna khan Reds beiseina a siamsak a, vanneihnaah khan beiseina an nei a ni. Tunah chuan Liverpool lawmpui mai hi kan tih theih awmchhun chu a ni," tiin Liverpool chu duhsakna a hlan.