Bayern player thar Choupo-Moting

Player theihna nei sang bik ni lo mah se Eric Maxim Choupo-Moting-a'n European top club tan a khelh chhunzawm zel dawn a, Paris St-Germain a chhuahsan hnuah Bayern Munich chu season khat chhung atan a zawm. 

Kum 31 mi striker hi thla hmasa khan PSG a a contract chu a zo a, treble champion German club hi a zawm ta a ni. Choupo-Moting chuan, "Bayern tana khelh duh loh tu nge awm ang? Bundesliga lama ka lo kir thei leh German club lian bera ka khel thei tur hi ka lawm hle," tiin a sawi. 

Cameroon inter-national hian German club Hamburg-ah a professional career ṭanin, Mainz leh Schalke tan a lo khel tawh a, 2017-18 season khan Stoke City tan khelin Premier League aṭangin a relegate pui. 

Stoke tan match 32 a goal nga a khung hnuah rin loh takin Paris Saint-Germain a zawm a, French club tan hian match 51-ah goal kua a khung. Champions League quarterfinal a Atalanta laka an comeback nana hun pek belha goal khungtu kha a ni. 

Bayern sporting direc-tor Hasan Salihamidzic chuan, "Tlarhmaah duhthlan tur kan ngah sawt dawn. PSG tana a khelh laiin tawnhriat ṭha tak a nei tawh a, Bundesliga hre sa a nih bakah free transfer-in a lo lut bawk - a ṭha vel vek a ni," tiin an player thar a fak.