Monte Carlo lalpa Nadal

Rafael Nadal chuan khawtual tlangval Gael Monfils hnehin a vawi kua nan Monte-Carlo Rolex Masters champion nomawi a chawi leh ta. Nizana final inkhel hmuhnawm takah seeded pangana Nadal hian seeded 13-na Monfils lakah hian 7-5, 5-7, 6-0 in hnehna a chang a ni.

Sapanish tlangval Nadal hian set khatna la tur pawhin darkar khat leh minute 13 chhung ngawt hun a mamawh. Set hnihnaah Monfils-a'n thapui tawhin set la let ve mah se set hnuhnung berah erawh Nadal a chungnung chiang hle a ni.

Mote Carlo-ah hian khawtual miin hlawhtlinna an chang khat hle a, kum 2000 a Cedric Pioline a champion hnuah Monfils hi French player final lut leh hmasa ber a ni nghe nghe.

'King of Clay' tia hming lem an vuah Nadal hian Clay Court-ah player ṭha bik a nih zia a lan tir le ta a, kumina Grand Slam pahnihna tur French Open atan beseina a neih san phah hle ang. World number 5 Nadal hian ATP World Tour final vawi 100 a khelhna niin, ATP Masters 1000 bikah title 28 a lakna chiah a bawk a, world number 1 Novak Djokovic nen an nomawi chawi zat a inang.

Champion Nadal hian € 717,315 (Rs 5,39,38,933) bakah Emirates ATP Rankings points 1,000 a hmuh belh a ni.