Champion tum Leicester an tlo

Leicester City-in champion an tum ruhzia an lantir zel e.

Pathianni zan Premier League inkhelah referee Jon Moss a langsar ber a, goal hmahruai khungtu Jamie Vardy a hnawhchhuah hnuah Leicester City leh West Ham United penalty a pe ve ve. King Power Stadium-ah 2-2 in an inhnehtawk. Tottenham Hotspurs laka Foxes fâlna chu point riat a ni.

Zanin dar 12:30 hian Spurs-in mikhual tana inkhelh harsatna hmun Britannia Stadium-ah Stoke City an hmachhawn dawn a, season tawp lam boruak a sang chho zel.

Leicester-in minute 18-naah training-naa an zir ang thlap ni awma mawiin goal an khung - a hmawr bawktu chu Vardy bawk!

A zawna match nga chak tawh Foxes an buai ta - minute 56-naah tluk der vangin Vardy-a'n yellow card vawi hnihna a hmu a, hnawhchhuah a ni.

Hun tawp lamah referee a talbuai ber niin a lang a, Leicester defender pawimawh Wes Morgan chuan Winston Reid lakah penalty a chawi a, supporter an lungawi lo. Hammers tan Andy Carroll-a'n a pet goal a, minute ruk a la awm. Minute 86-naah Michail Antonio thawhrah sengin Hammers left back Aaron Cresswell-a'n goal ropui a khung - West Ham-in 2-1 in hma an hruai.

Player 10-a khel Leicester-in point hlawhchhuah tumin an nawr let. Robert Huth-a beisei ang penalty pek a nih loh hnuah Carroll chuan substitute Jeffrey Schlupp tihtluk vangin penalty a chawi a, Leonardo Ulloa-a'n siphurh sut nan a hmang.

Foxes ṭantute'n referee chu 'inkhel ham tlak a ni lo' tiin an auel mah se hun tawpah erawh referee chunga lawm tur an ni - Leicester penalty hmun dana referee thutlukna a mak thung.

Beidawng duh lo Leicester City-in player 10-a khel chungin West Ham lakah point khat hlu tak an hlawh chhuak. April 24 hian goal 22 khung tawhtu Vardy tel loin Foxes-in Swansea City an mikhual dawn a, fiahin an awm chho zel dawn.

Leicester boss Claudio Ranieri chuan, "Inkhel hautak tak a ni. Red card-in engkim a tidanglam a, referee thuytlukna erawh ka sawisel ngai lo... 11 kan nihlai leh 10-a kan khelh hnu khan ropui takin kan khel thei ve ve a ni," a ti.

West Ham manager Slaven Bilic chuan, "Penalty ni lo hulhual a pe a ni," tiin referee a sawisel thung.

Pathianni zan inkhel dangah Liverpool-in Roberto Firmino leh Daniel Sturridge te hmangin Bournemouth 2-1 in an hneh a, Champions League khelh an tum zel.