DSK hnehtu Aizawl FC hmalam chiang lo

Aizawl FC-in Inrinni zanah Joel Sunday goal hmangin DSK Shivajians 1-0 in an hneh a, I League khel zel turin beisei an nei sang hle. Amaherawhchu Pathianni zanah Mumbai FC-in an mikhual Shillong Lajong 2-1 a an hneh avangin I League aṭanga tla tur a la hriat loh.

Mumbai FC, Aizawl FC leh Shillong Lajong te hi tla thei vek an ni. MPL champion-in match khelh tur an nei tawh lo a, April 24-a an match hnuhnung bera Lajong leh Mumbai-a a tu zawk zawk pawh an chak loh chuan Aizawl FC an him thei chauh tawh ang.

I League match tawp niah Mumbai FC-in tla ve thei lo DSK Shivajians an mikhual ang a, Shillong Lajong-in Kolkata club lian East Bengal an mikhual ang. DSK hian Mumbai an hneh loh chuan Federation Cup an khelh loh theih avangin chak ngei an tum dawn.

Captain David telin

Aizawl FC-in captain David Lalrinmuana an chhawr thei tawh a, midfield laiah Yuta Kinowaki nen an inkawp. Salgaocar an hneh loh ṭuma keeper Lalawmpuia aiah Soram Poirei luhtirin left wing-ah F. Lalrinpuia aiah H. Lalmuankima a inlan bawk.

Match sarih chhung hneh loh tawng tawh lo DSK Shivajians erawhin a zawnin match ruk chhung starting eleven ngai an hmang thung a, Mizo defender Zohmingliana Ralte leh Sena Ralte te'n hmun pawimawh an chang tihna a ni.

Chhandamtu Sunday

Pune khaw club-in Aser Pierrick Dipanda leh rawlthar Surachandra Singh hmangin goal chance an nei hmasa a, ball chang tam zawk erawh Aizawl FC an ni.

Point thum mamawh Aizawl FC midfielder H. Lalmuankima leh Yuta Kinowaki ten an hun ṭha neih chu goal zawnah an pet thei lo a, keeper tawnhriat nei ṭha Subrata Paul fiahin a awm lo.

Second half ṭantirh lamah Manipuri keeper Soram Poirei a chesual teuh hle a, Douhou Pierre leh Juan Quero te hmangin DSK-in Aizawl FC an rum ṭhaih bawk. Minute 61-na a ni a, Bawngkawn tlangval MK-a cross chu Joel Sunday-a'n a tauh lut a, Nigerian striker hian Mumbai FC leh Mohun Bagan FC an hneh ṭumin goal pawimawh a khung tawh bawk.

Goal luh hnuah Aizawl FC tlarhnung an muthlu zeuh a, Dipanda ball pet chu goal ngei tura ngaih ni mah se Soram Porei-a'n a dang ṭha takzet. MPL champion-in goal khat pawimawhna an hre zui a, tlarhnung an rem phui ṭha hle.

Injury time-ah erawh Aizawl FC an vannei a, DSK winger Quero chu penalty area-ah tihtluk ni mah se penalty pek a ni lo a, Real Madrid youth system-a inzir chhuak hian a sawisel nasat avangin yellow card a hmu thung.

Coach thukhawchang

DSK Shivajians Coach Derrick Pereira chuan, "Kan chak loh lohna a rei tawh avangin kan inthlahdah deuh a, kha aia inbuatsaih ṭha thei kan ni. Player
ṭhenkhat mahni tana khel tawpte an awm a, goal khung hma kan tum lutuk kha kan buaina chhan pakhat a ni. Kan khelh ṭhat ṭum a ni lo a, point hmuh kan phu lo," tiin chak loh chhuanlam a siam lo.

Aizawl FC coach Jahar Das chuan, "East Bengal leh Shillong Lajong kan hneh loh ṭum aṭang khan kan inzir ṭha hlein ka hria. DSK vanneih loh ṭum kan tawng chu thuhran ni se, kan rilru put hmang a inang lo a ni. Keini chuan kan theihna zawng zawngin kan khel a, I League match hnuhnung ber kan khelh danah kan lungawi a ni," tiin Vanglaini palai a hrilh.

Pathianni zanah Mumbai FC-in Steven Dias hmangin hma an hruai a, Lajong lamin Brazilian striker Fabio hmangin sut mah se minute 87-naah Min-Chol Son-a'n a club hlui Shillong Lajong lamah Mumbai chakna goal a khung.

Aizawl FC boss Jahar Das chuan, "Lajong chak chu kan duh dan ber a ni a, amaherawhchu an in draw ai chuan Mumbai chak hi a lawmawm zawk. Tunah chuan him theih dan chi hnih a awm a, East Bengal emaw DSK emaw an chak ngei ka beisei," tiin Vanglaini palai a hrilh.