Bengaluru an champion

I League champion hre turin April 24 zan nghah thlen a ṭul ta lo. Nizan khan Bengaluru FC chuan Sree Kanteerava Stadium-ah Eugeneson Lyngdoh leh Seminlen Doungel goal hmangin Salgaocar 2-0 in an hneh a, season thum chhunga a vawi hnih nan India ram league sang berah an champion.

Blues coach Ashley Westwood chuan Chaltlang rawlthar Malsawmzuala chungah rinna a nghat chhunzawm a, left back rinawm Lalchhuanmawia nen starting eleven an chang. Salgaocar-in Aizawl FC an hneh ṭuma chakna goal khungtu Darryl Duffy an chhawr theih loh avangin Scottish striker aiah Manandeep Singh chu inkhel bul ṭantir a ni.

Minute riat chiah a la kal tihin Salgoacar keeper Karanjit Singh-a ball hnek chhuah chu Eugeneson-a zawnah a tla thla a, season liam ta I League best midfielder hian yard 25 vel
aṭangin a pet goal. Champion tura point thum mamawh Bengaluru an fimkhur zui a, stadium chhung light chian loh vanga inkhel a khawtlai hret tih loh chu harsat an nei tawh lo a, captain Sunil Chhetri siam chu rawlthar Len chuan hun tawp hma hretin champion nemnghehna goal a khung leh bawk.

Nikum season khan Blues hi an mualah Jeje Lalpekhlua telna Mariners-in nomawi an chhuhsak a, tun season-ah an mual ngeiah an champion. Mizo tlangval panga - Chhuantea, Sawm­tea, Lalthuammawia, Beikho­khei Beingaichho leh Daniel Lalhlimpuia te telna Bengaluru hian April 24 zana Mohun Bagan an hmachhawn zawhah nomawi an chawi ang.